Almaty oqýshylary Alash zııalylarynyń sırek qoljazbalarymen, sýretterimen tanysty

ALMATY. QazAqparat - Almaty oqýshylary Alash zıııalylarynyń sırek qoljazbalarymen, sýretterimen tanysty. Tanymdyq shara Qaıym Muhamedhanov atyndaǵy Bilim men Mádenıet ortalyǵy qoǵamdyq qorynyń bastamasymen uıymdastyryldy, dep habarlaıdy QazAqparat.

Qalanyń kolledjderi men JOO stýdentteri, mektep oqýshylary «Alash» sóziniń etımologııasyn tereń uǵyndy.

Qor dırektory, professor, belgili qaıratkerdiń qyzy Dına Muhamedhannyń aıtýynsha, Alash qaıratkerleriniń tarıhyn bilý óskeleń urpaqty rýhanı jańǵyrý jolynda tárbıleýdiń bir tetigi.

Aıta ketý kerek, Alash qaıratkeri, memlekettik syılyqtyń laýreaty Qaıým Muhamedhanov bala kezinen Alash qaıratkerlerin kórip ósken. Olar Semeıde turǵan kezinde ǵalymnyń ákesi Muhamedhan Seıitqulovtyń úıine jıi bas suǵatyn. Belgili ultjandy azamat, metsenat M.Seıitqulov «Saryarqa» men «Abaı» gazetterin qarjylandyryp otyrǵan. Ol kisi kóptegen ultjandy azamattardy qoldap, saıasat minberin shyǵýǵa yqpal etip otyrǵan. Ózi de halqynyń tarıhyn zerttep, aýyz ádebı jáne jazba muralaryn qaǵazǵa túsirip, alǵashqy jınaǵyn shyǵarǵan.

«Meniń ákem, ǵalym Qaıým Muhamedhanov alash zııalylarynyń belgisiz sýretterin jınap, olardyń attaryn jazyp, eńbekterin tóte jazýdan aýdaryp, eńbekterine kommentarıı jazyp otyrǵan. Saıası qýǵyn-súrgin qurbandarynyń búgingi urpaqtaryn taýyp, ómirbaıanyn jazyp qaldyrý onyń basty maqsaty bolǵan. Sırek derekter el ǵalymdaryna osy bir tarıhı aqtańdaqty anyqtaýda ólsheýsiz yqpal etti», - dedi D.Muhamedhan.

Aıta ketý kerek, joba jalǵasyn taýyp keledi. Qalalyq Іshki saıasat basqarmasynyń qoldaýymen aýdıtorııa ulǵaıyp, 700-ge tarta jas tartyldy.

Alash zııalylarynyń qaıǵyly taǵdyry artyndaǵy eline máńgilik úlgi bop qaldy. Olar azamattyq, adamgershilik, moraldyq ustyndary, zııatkerlik kóshbasshylyǵy aıqyn jigitter bolǵan.

Álıhan Bókeıhanov óz eliniń qamyn oılaıtyn «Alash» partııasynyń negizin qalaý arqyly myńdaǵan azamatty jumyldyra bildi.

Osy az ǵana shoǵyr eldegi bilim, densaýlyq saqtaý, sot, densaýlyq saqtaý, ónerkásip pen aýylsharýashylyǵyn ǵylymdarynyń negizin qalap ketti.

Osydan 100 jyl buryn alashtyqtar demokratııalyq qoǵamnyń qandaı bolatyndyǵyn óz is-áreketterimen kórsetip ketti. Salyq, ádil sot, ózge elderden táýelsiz ónerkásip joldaryn salý, asyl tuqymdy mal ósirý sııaqty máselelerdi olar 100 jyl buryn kótergen.

Professor Dına Muhamedhan, 31-mamyr Saıası qýǵyn-súrgin qurbandaryn eske alý kúnine oraı alashtyqtardyń quıryqty juldyzdaı qysqa ómiri týraly tanymdyq sharalardy ótkizý asa mańyzdy ekendigin atap ótti.