Almaty oblysynyń joldarynda byltyr 507 adam qaıtys boldy.
TALDYQORǴAN. QazAqparat - 2016 jyly Almaty oblysynyń joldarynda kólik apatynan 507 adam qaza tapty, dep habarlaıdy QazAqparat tilshisi.
Óńir 4 jyl qatarynan kólik apatynda qaza bolǵandar sany boıynsha respýblıka boıynsha aldyńǵy qatarda keledi. Tek ótken jyly 2086 jol-kólik oqıǵasy tirkelip, 507 adam kóz jumyp, 3 myńǵa jýyǵy túrli dene jaraqatyn alǵan. Jol-kólik oqıǵalary Almaty-Óskemen, Almaty-Qorǵas, Almaty-Bishkek jáne Almaty-Astana tas joldarynda jıi tirkelgen. Jáne eń kóp ólim-jitim de osy joldar enshisinde.
Bul derekter Almaty oblysy prokýratýrasynda ótken alqaly jıynda ókinishpen mysalǵa alyndy. Zańdy qadaǵalaýshylar bul óte alańdatarlyq jaǵdaı dep dabyl qaǵyp otyr.
Apattardyń basty sebebi - jyldamdyqty arttyrý, qarsy baǵytqa shyǵyp ketý jáne sapasyz joldar. Prokýratýra qyzmetkerleri tekserý barysynda apattardyń aldyn alý maqsatynda ázirlengen «Qaýipsiz jol» baǵdarlamasy nátıjesiz bolǵanyn anyqtady. Jol saqshylarynyń, jergilikti polıtsııa qyzmetiniń, jol jóndeýshilerdiń jumystary synǵa alynyp, birqatar mindettemeler berildi. Sondaı-aq tekserý nátıjesinde avtomattandyrylǵan KRIS-P atty qondyrǵylardyń jol polıtsııa qyzmetkeriniń jumysynan edáýir tıimdi qyzmet atqaratyny anyqtaldy. Máselen, bir táýlikte bir ǵana jol qyzmetkeri eki zań buzýshylyqty anyqtap hattama toltyrsa, avtomattandyrylǵan qondyrǵy 90-nan astam quqyq buzýshylyqty tirkeıdi.
