Almaty oblysynyń joldaryna 16 mlrd teńgeden astam qarjy jumsaldy
TALDYQORǴAN. QazAqparat - Bıyl Almaty oblysynyń joldaryn jóndeýge 16 mlrd teńgeden astam qarjy bólindi. Nátıjesinde óńir joldarynyń 78 paıyzy jaqsy jáne qanaǵattanarlyq jaǵdaıǵa jetkizildi, - dep habarlaıdy QazAqparat tilshisi.
Almaty oblysynda 9600 shaqyrymnan astam avtomobıl joldary bar. olardyń 2850 shaqyrymy respýblıkalyq mańyzy bar joldar. Oblystyq avtomobıl joldary jáne jolaýshylar tasymaly basqarmasynyń basshysy Erjan Jasybaevtyń aıtýynsha, jyldan-jylǵa jóndelgen joldar kólemi jáne oǵan bólingen qarjy artyp keledi. Bıyl negizgi basymdyq óńirdiń týrıstik múmkindikterin arttyratyn baǵyttarǵa aýdaryldy.
«Aqshı aýylynyń ortalyq jolynan kól jaǵasyndaǵy demalys oryndaryna deıingi joldarǵa asfalt tóseldi. Balqash kóline deıingi joldyń kúrdeli jóndeý jumystary bastaldy. Qazirgi tańda kópirlerin aýystyryp jatyrmyz. Aldaǵy eki jylda sapaly jol tóseledi», - deıdi basqarma basshysy.
Budan bólek Taldyqorǵan qalasynyń joldaryn jóndeýge oblys bıýdjetinen 3,8 mlrd teńge bólingen. Oblys ortalyǵyndaǵy joldardyń jıyntyǵy 564 shaqyrym. 26 shaqyrym bolatyn 28 kóshege kúrdeli jóndeý júrgizilýde. 14 kóshe ortasha jóndeýden ótip, 51 kóshege tas tóseldi. Qalany gazdandyrý kezinde buzylǵan 78 kósheniń asfalttary qalypqa keltirilýde.
