Almaty oblysynyń jemis baqtary 23 myń gektarǵa jetti
TALDYQORǴAN. QazAqparat - Almaty oblysynda baq sharýashylyǵy qarqyndy damyp keledi. Bıyl óńir baǵbandary 23 myń gektar alma-almurt, órik, shıe, shabdaly syndy basqa da aǵashtardy kútip baptaýǵa kiristi, dep habarlaıdy QazAqparat tilshisi.
Baǵbandar bıyl qys erekshe sýyq bolsa da, kóktem sharýashylyqqa qolaıly bolǵanyn aıtady. Almaty oblysynda baq ósirýge óte qolaıly óńirdiń biri Uıǵyr aýdany. Tabıǵaty jumsaq, topyraǵy qunarly, sýy mol aımaqta 3,5 myń gektar baq bar. Alma, órik, shabdaly óz aldyna, aýdan birneshe jyldan beri jańǵaqty da jersindirip, kóshet sanyn kóbeıtýde. Máselen Súmbe aýyldyq okrýginde 380 gektar jerge jańǵaq otyrǵyzyldy. Bıylǵy jyly taǵy 300 gektar jerge otyrǵyzamyz, deıdi aýdandyq aýylsharýashylyǵy bóliminiń bas mamany Rahymjan Omarov.
Al aýdandaǵy baǵbandardyń aldy birneshe jyldan beri jınaǵan ónimin eksportqa shyǵarýda. Ásirese osy jerdiń órigine Reseıdiń iri qalalarynan suranys artýda. Bıyl aýdan ortalyǵynda jemis-jıdek óńdeıtin tseh ashylady dep josparlanýda. Bul ónimdi shıkizat kúıinde emes, túrli sýsyn men tosap jasap, daıyn ónim retinde jóneltýge múmkindik týǵyzbaq.
Jyl sońynda Almaty oblysyndaǵy baqtyń jalpy aýmaǵy 24 myń gektarǵa jýyqtamaq. Onyń 2200 gektary ıntensıvti tehnologııamen ósirilse, qalǵan aýmaqta ataqty aport baǵy ósiriledi.
