Almaty oblysynyń Jedel járdem stansasynyń dırektory Qanat Qaldybaev: Aýrý belgilerin durys aıtý kerek
TALDYQORǴAN. QazAqparat - Almaty oblystyq jedel medıtsınalyq járdem stansasyna táýligine kelip túsetin 2 myń qońyraýdyń 100-ge jýyǵy negizsiz. Almaty oblystyq jedel medıtsınalyq járdem stansasynyń dırektory Qanat Qaldybaev baspasóz máslıhatynda osylaı málim etti, dep habarlaıdy QazAqparat.
Onyń aıtýynsha, bir brıgada táýligine 15 shaqyrýǵa qyzmet kórsetýi tıis, alaıda ekıpaj táýligine 27-28 shaqyrýǵa barady.
«Jedel járdem stansasy 2018 jyldyń jeltoqsan aıynan bastap biryńǵaı dıspetcherlik qyzmetke kóshti. Túsken shaqyrtýlar «KÓMEK-103» avtomattandyrylǵan basqarý júıesinde óńdeledi. Qońyraý shalǵan ýaqyttan bastap dıspetcher alynǵan málimetti shaqyrý sanatyna baılanysty suryptap, ony jedel medıtsınalyq járdem brıgadasyna tapsyrǵanǵa deıin 5 mınýt ýaqyt ketý kerek. Al jedel járdem 4 sanat boıynsha kómek kórsetedi», - dedi Qanat Qaldybaev.
Call-ortalyqta táýligine 30 adam jumys jasaıdy. Avtokólikterge GPS-navıgator ornatylǵan. Bul ár brıgadanyń qaı jerde ekenin onlaın rejimde 24 saǵat boıy baqylaýǵa múmkindik beredi.
Sonymen qatar jedel járdem stansasy dırektorynyń aıtýynsha, birinshi sanat boıynsha kelý ýaqyty 10 mınýt, ekinshi sanat boıynsha 15 mınýt, úshinshi jáne tórtinshi emhanalyq qyzmet boıynsha jedel járdem kóligi bir saǵat ishinde kelýi tıis.
Oblystyq jedel járdem stansasyna 2019 jyldyń qarasha aıyna deıin 691 546 shaqyrtý túsken. Onyń ishinde 240 myńǵa jýyǵyna 4-sanat boıynsha kómek kórsetilgen.
Aıta keterligi, búgingi tańda Almaty oblysynda bir stansa, 21 bólimshe, 39 jedel járdem pýnkti jáne eki sanıtarlyq avıatsııa bólimshesi bar. Oblysta 165 kóshpeli brıgadanyń 121 jedel járdem brıgadasy táýlik boıy jumys isteıdi.
