Almaty oblysynyń jastary arasynda qylmys deregi kóbeıdi
TALDYQORǴAN.QazAqparat - Almaty oblysynyń jastary arasynda bıyl qylmys deregi kóbeıdi, dep habarlaıdy QazAqparat tilshisi.
Óńirde jastar qylmysy ótken jylmen salystyrǵanda 6,4 paıyzǵa artqan. Sondaı-aq jas jetkinshekterdiń óz-ózine qol jumsaý faktileri jıilegen. Máselen 2015 jyly 69 oqıǵa tirkelse, 2016 jyly 85 jas óz erkimen bul ómirmen qoshtasqan.
Jumyssyz júrgen jastar qatary da azaıar emes. Bıyl jetisýlyq jastardyń 2,7 paıyzy jumyssyzdar qatarynda. Salystyrmaly túrde aıtar bolsaq ótken jyly 2,5 paıyz bolǵan. Jalpy Almaty oblysyndaǵy jastar sany 500 myńǵa jýyq.
Óńir jastarynyń ózekti problemalary oblystyq jastar saıasaty máseleleri basqarmasynyń jyldy qortyndylaý jıynynda málim boldy. Oblys aýmaǵynda ótkizilip jatqan kóptegen saltanatty sharalar, túrli aktsııalar men fleshmobtar janynda áleýmettik máseleler kenjeleý qalyp keledi.
Sondaı-aq jas órenderdiń basqa dinı aǵymǵa ketip qalýy da alańdatyn jaǵdaı. Basqosýǵa tóraǵalyq etken oblys ákiminiń orynbasary Jaqsylyq Omar osyndaı kúrdeli máselelerdiń sheshý joldaryn «jastardyń jol kartasyna» toptastyrýdy josparlap otyr. Atap aıtqanda 2017 jyldyń naýryzyna deıin ár aýdannyń, ár aýyldyń jastarynyń máselesiniń barlyǵyn kóterip, onyń sheshý joldaryn, qarajat máselesin qarastyrǵan aýqymdy qujat daıyndalady. Jáne sol «jol kartasy» aıasynda ózekti máseleler kezeń-kezeńmen óz sheshimin tabatyn bolady.
