Almaty oblysynyń jańa avtoparkine 25 avtobýs satyp alyndy
Prezıdent tapsyrmasymen bıyl alǵash ret oblystyq kommýnaldyq avtobýs parki quryldy. Nátıjesinde óńirdiń 332 turǵyny jumyspen qamtyldy.
Avtobýs parki Іle aýdany, Ótegen batyr aýylynda ornalasqan. Munda qazirdiń ózinde 25 tehnıka jumys isteıdi. Jumys kestesi saǵat 5:40-tan 22:00-ge deıin, avtobýstar qozǵalysynyń aralyǵy – 20 mınýt.
Oblys ákiminiń orynbasary Almas Batanov oblys turǵyndarymen kezdesý barysynda eldi mekenderdegi qoǵamdyq kóliktiń tapshylyǵyna qatysty aryz-shaǵymdar túskenin basa aıtty.
«Memleket basshysy 2022 jylǵy 19 qazanda Almaty oblysyna jumys sapary barysynda jolaýshylar kóligimen qamtylmaǵan aýyldy eldi mekenderge avtobýs marshrýttaryn beretin kommýnaldyq kásiporyn qurýdy tapsyrǵan bolatyn. Osyǵan oraı 2023 jyldyń 31 qańtarynda «Almaty oblysynyń avtobazasy» JShS memlekettik kásiporny quryldy.
Osy ýaqytqa deıin logıstıka jáne basqa da resýrstar boıynsha jumystar júrgizilip kelgendikten, bul park óz jumysyn bastaı almady. 1 shildede park alǵashqy marshrýttardy iske qosty. Sonymen qatar biz Almaty qalasymen birlese otyryp, aglomeratsııanyń 50 shaqyrymdyq aımaǵynda jańa baǵyttardy ázirlep jatyrmyz. Sonymen qatar qazir oblys boıynsha 9 baǵytta qyzmet kórsetetin qosymsha 130 jańa avtobýs satyp alý jumystary júrgizilýde», - dedi oblys ákiminiń orynbasary Almas Batanov.
Avtopark 20-ǵa jýyq aýyldy eldi mekenge, bir qalaǵa – «Gate City» jáne Іle aýdanynyń eki iri shaǵynaýdanyna qyzmet kórsetedi.
Sondaı-aq jaqyn arada avtobýstarda QR-kod nemese bank kartasy arqyly tólem jasalatyn elektrondy bılet júıesi engiziletin bolady.
