Almaty oblysynyń úzdik sportshylary marapattaldy
TALDYQORǴAN. QazAqparat - Búgin Taldyqorǵan qalasynda 2016 jyldyń qorytyndysy boıynsha úzdik sportshylar marapattaldy. Ótken jyly oblys sportshylary túrli dárejedegi 1 300-den astam júlde ıelengen. Marapattaý rásimin oblys ákiminiń orynbasary Serik Turdalıev ótkizdi, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Serik Turdalıev óz sózinde Almaty oblysynda memleket qoldaýynyń nátıjesinde sport salasyna erekshe nazar aýdarylyp otyrǵanyn atap ótti.
«2016 jyly oblys sportshylary 1 300-den astam medal ákeldi. Solardyń qatarynda álemdik jáne Azııa oıyndarynyń arenasynan, bedeldi halyqaralyq týrnırlerden túrli deńgeıdegi medaldardy ıelenip oralǵan Karına Gorıcheva, Raýshan Qoıshybaeva, Margarıta Elıseeva, Jánibek Álimhanuly, Albert Lınder, Anjela Shalqarova, Marına Sedneva, Dınara Bolatbekovany atap ótýge bolady», - dedi S. Turdalıev.
Basqosýda 30-ǵa tarta úzdik sportshylar men olardyń jattyqtyrýshylary dıplomdarmen, 150 myń teńge kóleminde aqshalaı syılyqtarmen marapattaldy. Olardyń arasynda Rıo-de-Janeırodaǵy Olımpıada oıyndarynyń qola júldegeri Karına Gorıcheva men Paralımpıada oıyndarynyń qola júldegeri Raýshan Qoıshybaeva da bar.
Sport mekemeleri men klýbtary da nazardan tys qalmady, ujymdardyń árqaısysyna 500 myń teńgeden syıaqy berildi. Atap aıtqanda, Taldyqorǵan qalasyndaǵy № 1 olımpıadalyq rezervtegi balalar men jasóspirimderdiń sport mektebi, «Іle» kásibı gandbol klýby, Qarasaı aýdandyq dene shynyqtyrý jáne sport bólimi, «Grek-rım, erkin jáne áıelder kúresi» oblystyq federatsııasy marapatqa ıe boldy.
Sport taqyrybyn nasıhattap júrgen jýrnalıster de marapattalyp, olarǵa aqshalaı syılyqtar men arnaıy dıplomdar berildi.
«Elimizdi shet memleketterge tanytyp jatqan sportshylarǵa eren eńbekteri úshin alǵys aıtamyz. Sportshylarymyz Jetisý óńiriniń ósip-órkendeýine de óz úlesterin qosýda. Memleket basshysynyń qamqorlyǵynyń arqasynda qajetti materıaldyq-tehnıkalyq bazamyzdy qosqanda bizde barlyq múmkindikter jasalǵan. Oǵan qosa sportshylarǵa qoldaý kórsetilip, stıpendııalar berilip keledi. Jetistikterimiz bar, biraq alda odan da bıik mejelerdi baǵyndyrý mindeti tur», - dedi kezdesý sońynda Serik Turdalıev.
Sonymen qatar oblys ákiminiń orynbasary buqaralyq sportqa erekshe nazar aýdarylatynyn aıtty. Máselen, bıylǵy jyldyń ózinde oblys aýdandarynda 4 dene shynyqtyrý-saýyqtyrý kesheni jáne 3 shaǵyn fýtbol alańy salynady.
