Almaty oblysynyń úzdik mádenıet mekemesi avtokólik utyp aldy (FOTO)
TALDYQORǴAN. QazAqparat - M. Tynyshbaev atyndaǵy tarıhı-ólketaný murajaıy Almaty oblysyndaǵy «Úzdik mádenıet mekemesi» bolyp tanylyp, avtokólik utyp aldy.
Búgin Taldyqorǵan qalasynda І.Jansúgirov atyndaǵy Mádenıet saraıynda mádenıet jáne óner qyzmetkerleriniń kásibı merekesine oraı ótken jıynda ózge de óner ujymdary men ónerpazdar arnaıy dıplomdarmen jáne 100 myń teńge aqshalaı syılyqtarmen marapattaldy, dep habarlaıdy oblys ákiminiń baspasóz qyzmeti.
Dástúrli túrde úshinshi jyl uıymdastyrylyp otyrǵan bul kásibı merekede aýdan, qalalardyń, oblystyq mekemeleriniń 2016 jylǵy jetistikterin kórsetetin kórme uıymdastyrylyp, mádenıet salasynyń tynys-tirshiligi týraly arnaıy daıyndalǵan fılm kórsetiledi.
Saltanatty jıynda sóz sóılegen oblys ákimi Amandyq Batalov oblystaǵy mádenıet jáne óner ujymdarynyń jetken jetistikterine, el táýelsizdiginiń 25 jylynda atqarylǵan ıgi isterdi nasıhattaýdaǵy óner adamdarynyń sińirgen eńbegine, sonymen qatar alǵa qoıǵan mindetterge toqtalyp ótip, rýhanı salany damytýǵa erekshe nazar aýdarylyp otyrǵanyn jetkizdi. Mádenıet nysandaryna kúrdeli jóndeý júrgizilip, jańa nysandardyń qurylystary bastalýda, shtat bólinip, materıaldyq-tehnıkalyq bazalary nyǵaıtylyp keledi. Bul oraıda eskertkishter ornatýǵa, kitap basý isine de aıryqsha nazar aýdarylyp otyr. Osy jáne ózge de atqarylǵan ister men kórsetilgen qoldaýlar týraly atap ótken oblys basshysy A. Batalov:
- Qurmetti óner salasynyń qyzmetkerleri men ardagerleri!Búgingi erekshe mereke kúni mádenıet pen óner salasyna eńbegi sińgen aǵa býyn ókilderine aıtar alǵysymyz sheksiz. Elimizdiń órkendep-ósýine, mádenıet bıigine shyǵarmashylyq turǵydan qyzmet etip, halyqty tamasha ónerlerińizben qýanta berińizder! - dep izgi tilegin jetkizdi.
Quttyqtaý sózinen keıin A. Batalov óz isiniń úzdikterin marapattap, oblys ákiminiń jáne QR Mádenıet jáne sport mınıstrliginiń Qurmet gramotalaryn, sonymen qatar 16 nomınatsııa boıynsha jeńimpazdarǵa syılyqtar tapsyrdy.
Atap aıtqanda, oblystyq B. Rımova atyndaǵy drama teatr ártisi Bazarbaı Toqymtaev «Úzdik akter», osy ujymnyń aktrısasy Tolǵanaı Aǵlamova «Úzdik aktrısa» atandy.
Súıinbaı atyndaǵy oblystyq fılarmonııa ánshisi Baqbergen Asqarbekov «Úzdik ánshi», osy óner oshaǵynyń ónerpazdary Altynaı Kúrishbaeva «Úzdik bıshi», Alma Kishikbaeva «Úzdik mýzykalyq aspapta oryndaýshy» nomınatsııasyn jeńip aldy.
Sol sııaqty Jambyl aýdany Qarakestek aýyldyq jáne Іle aýdandyq kitaphanalary, Panfılov aýdanyndaǵy «Aıjanqyz» halyqtyq bı ansambli jáne basqa da birqatar ujymdar úzdikter qatarynan kórindi. Jeńimpazdardyń barlyǵyna dıplom jáne 100 myń teńgeniń sertıfıkaty tabystaldy.
Sondaı-aq «Súıinbaı sazy» folklorlyq-etnografııalyq ansambline jańa avtobýstyń kilti berildi.
Mádenıet salasynyń ardageri retinde Nadejda Lýshnıkova men sala qyzmetkerleri atynan Alakól aýdandyq mádenıet jáne tilderdi damytý bóliminiń basshysy Arnur Sadyqov sóz sóılep, mereke qorytyndysynda óner sheberleriniń kontserti usynyldy.
