Almaty oblysynyń úzdik dárigerlerine kólik kiltteri berildi
TALDYQORǴAN. QazAqparat - Taldyqorǵanda Medıtsına qyzmetkerleri kúni qarsańynda saltanatty jıyn ótip, jyl qortyndysy boıynsha úzdik dárigerler men medıtsına mekemeleri anyqtaldy, dep habarlaıdy Qazaqparat tilshisi.
Almaty oblysynyń úzdik dárigeri bolyp Іle aýdandyq aýrýhanasynyń hırýrgııa bóliminiń meńgerýshisi Aıdyn Elikbaev tanyldy. Al oblystaǵy úzdik aýyl dárigeri ataǵyn Taldyqorǵan qalasyna qarasty Erkin aýyldyq ambýlatorııasynyń meńgerýshisi Áskerbek Oralbaev jeńip aldy.
Ekeýine de oblys ákimi Amandyq Batalov «Lada Granta» kóliginiń kiltterin tabystady. Sondaı-aq óńir basshysy úzdik densaýlyq saqtaý mekemelerine qarjylaı syılyqtar tapsyrdy.
Jalpy Almaty oblysynyń densaýlyq saqtaý salasynda 19 myń adam eńbek etedi. Turǵyndarǵa 600-den astam medıtsınalyq mekeme sapaly qyzmet kórsetip keledi. Sońǵy 5 jylda densaýlyq saqtaý salasyna bólinetin qarjy kólemi 59 paıyzǵa ósip, 2017 jyly 83,6 mlrd teńgege jetti. 2017-2018 jyldar aralyǵynda 22 medıtsınalyq nysan salý josparlanyp otyr.
