Almaty oblysynyń úsh aýylynda qyzylsý júrdi
ASTANA. Aqpannyń 22-si. QazAqparat /Damır Baımanov/ - Almaty oblysynyń úsh aýylynda qyzylsý júrip ótti, dep habarlady dúısenbi kúni Tótenshe jaǵdaılar mınıstrliginen.
Qutqarýshylardyń málimetteri boıynsha, Jambyl aýdanynyń Uzynaǵash aýylynda qardyń erýi, jaýyn-shashynnyń bolýy jáne Uzynaǵash ózeninde sý deńgeıiniń kóterilýi saldarynan Jambyl kóshesinde tórt turǵyn úıdi sý basyp qaldy, Moldaǵulova kóshesindegi kópir, eki turǵyn úı jáne tórt úı janyndaǵy jer telimi zardap shekti. Qutqarý vedomstvosynyń baspasóz qyzmetinen habarlaǵandaı, zardap shegýshiler qaýipsiz jerge kóshirilip, týǵan-týystaryna jáne №6 lıtseıdiń jataqhanasyna jaıǵastyryldy.
Aýdandyq qutqarýshylar qyzmeti №28237 áskerı bólimniń jeke quramymen birlesip, ózen arnasyn tazartty jáne drenaj aryǵyn qazdy. Qutqarý jáne jaǵalaýdy bekitý jumystaryna Almaty oblysy boıynsha tótenshe jaǵdaılar departamentiniń jeke quramynyń 30 adamy men 4 tehnıkasy jumyldyryldy.
Osyndaı jaǵdaı Uıǵyr aýdanyndaǵy Shonjy aýylynda jáne Qarasaı aýdanynyń Raıymbek selolyq okrýginde qalyptasyp otyr.
