Almaty oblysynyń túrmelerinde jappaı maska tigilip jatyr

TALDYQORǴAN. QazAqparat - Almaty oblysynyń túzetý mekemelerinde jazasyn ótep jatqan azamattar jappaı maska tigip jatyr. Osylaısha sottalǵandar koronovırýstyń taralýyna qarsy kúreske óz úlesin qosýda, dep habarlaıdy QazAqparat tilshisi.

Elimizde koronavırýstyń taralýyna baılanysty QR Іshki ister mınıstri Erlan Turǵymbaevtyń tapsyrmasymen baqylaý beketterinde turǵan barlyq qyzmetkerler medıtsınalyq maskamen qamtamasyz etý mindetteldi. Osyǵan oraı Almaty oblysyndaǵy Zarechnyı, Jaýǵashty aýyldaryndaǵy túrmelerde betperde tigý jolǵa qoıyldy. Qazirgi tańda 200-ge jýyq sottalǵan eki aýysymda maska tigip jatyr. Qosymsha 50-ge jýyq jazasyn óteýshi úıretilýde.

Jaýǵashtydaǵy áıelder kolonııasynda maska matasyn kesip, piship daıyndap berse Zarechnyı túrmesinde tigin mashınasymen tigip, ilgishin taǵyp, sterıldi etip shyǵarýda. Ár sottalýshy áýel basta 5-10 maska shyǵarsa qazir kúnine 70-80 betperde ázirleıdi. Al táýligine 7,5-8 myń dana tigiledi. «LA 155/8» mekemesinde jazasyn ótep jatqan Almas esimdi azamat ta birneshe kúnde maska tigýdiń sheberine aınaldy.

«Covid-19 pandemııasymen kúresýge sottalǵandar atynan úlesimizdi qosyp jatyrmyz. Bul jerde aqshamyzdy tólep jatyr jaqsy. Memleket bizge tapsyrys berdi. Odan basqa úkimet aldynda arymyz taza bolý úshin keıbir sottalǵandar óziniń bir kúndik jalaqysyn tegin halqymyzǵa kómekke berdik», - deıdi sottalýshy.

Almaty oblysyndaǵy túzetý mekemelerine 150 myń maskaǵa qajet mata jetkizilgen. Munan bólek jazasyn ótep jatqandardyń da qaýipsizdigi qamtamasyz etilip, qorǵanys zattar taratylyp turady.