Almaty oblysynyń turǵynynan qaraqshylar 10 keli altyn quımany tartyp alǵan
TALDYQORǴAN. QazAqparat – Almaty oblystyq Polıtsııa departamenti Krımınaldyq polıtsııa basqarmasynyń qyzmetkerleri jedel-izdestirý sharalary barysynda Qarasaı aýdanynyń 49 jastaǵy turǵynyn tonap ketken kúdiktilerdi ustady, dep habarlaıdy QazAqparat tilshisi.
Anyqtalǵandaı, olar jábirlenýshige kúsh qoldanyp, 10 kg 700 g bolatyn altyn quımalaryn ıemdengen.
«Jaqynda Almaty oblysy PD kezekshi bólimine kúsh qoldanyp, altyn quımalardy ıemdenip ketken belgisiz tulǵalarǵa qatysty zańdy sharalar qabyldaý týraly ótinish kelip tústi. Saýatty júrgizilgen jedel-izdestirý jumystary barysynda biz kúdiktilerdi anyqtap, ustadyq. Olar Almaty oblysynyń 26-38 jas aralyǵyndaǵy týmalary bolyp shyqty», - dedi Almaty oblysy PD bastyǵynyń orynbasary Danııar Mendebaev.
Kúdiktiler qylmysty tolyǵymen moıyndaǵan.
«Olarǵa qatysty 192-baptyń 4-bóligi boıynsha qylmystyq is qozǵaldy, ıaǵnı adamdar tobymen jasalǵan asa iri mólsherdegi qaraqshylyq shabýyl. Barlyq kúdiktiler QR QІJK 128-baby tártibinde qamaýǵa alyndy. Barlyq qajetti jedel jumystar júrgizilýde», - dep tolyqtyrdy Danııar Mendebaev.
