Almaty oblysynyń turǵynynan 70 qap «Altyn tamyr» tabyldy
TALDYQORǴAN. QazAqparat - Almaty oblysy Kóksý aýdanynyń 40 jastaǵy turǵynynan 70 qap «Altyn tamyr» tabyldy. Óte sırek kezdesetin ári joıylyp bara jatqandyqtan Qyzyl kitapqa engizilgen ósimdikti zańsyz terýge qylmystyq jaýapkershilik qarastyrylady, dep habarlaıdy QazAqparat tilshisi.
Oqıǵa Kóksý aýdanynyń Balpyq bı aýylynda tirkelgen. Polıtsııa qyzmetkerleri tárkilegen «Altyn tamyrdyń» salmaǵy 877 kelige jetip otyr.
«Qazirgi kúni bul ósimdiktiń qaıdan jınalǵany anyqtalý ústinde. Oqıǵaǵa qatysty qylmystyq is qozǵalyp, «Altyn tamyr» saqtalǵan qoranyń ıesi kúdikke ilinip otyr. Al aýyl turǵynynan alynǵan ósimdiktiń «Qyzǵylt semizot» atalatyn «Altyn tamyr» ekeni taǵaıyndalǵan saraptama qorytyndysy boıynsha rastalady. Saraptama arqyly rastalǵan jaǵdaıda memleketke keltirilgen shyǵyn da eseptelmek», - delingen baspasóz baıanynda.
Polıtsııanyń túsindirýinshe, sotqa deıingi tergeý QR Qylmystyq kodeksiniń 339 baby (Sırek kezdesetin jáne joǵalyp ketý aldynda turǵan, sondaı-aq paıdalanýǵa tyıym salynǵan ósimdik túrleriniń zańsyz aınalymy) boıynsha qozǵalýy múmkin.
«Altyn tamyr» kóptegen paıdaly emdik qasıetke ıe ári halyqtyq medıtsınada keńinen qoldanylatyn ósimdik. Zańsyz jınaýdyń saldarynan jyl ótken saıyn quryp bara jatqan ósimdik Qazaqstannyń Qyzyl kitabyna engizilgen bolatyn.
