Almaty oblysynyń turǵyny toıda syıǵa alǵan bir qoıannyń basyn 300-ge jetkizgen
TALDYQORǴAN. QazAqparat - Almaty oblysynyń Balqash aýdanynda turatyn Baqtyǵalı Dáýitbaev bir jarym jyldan beri qoıan asyrap, kásibin júrgizip keledi, dep habarlaıdy QazAqparat tilshisi.
Kásipkerdiń atap ótýinshe, naryqta bul úı janýarynyń eti de, terisi de qundy. Jyldam kóbeıetini taǵy bar. Memleketten jeńildetilgen nesıe alyp, kásibin dóńgeletip otyrǵan isker azamattyń qoıan asyraýmen aınalysýyna toıdaǵy oqıǵa sebep bolǵan.
«Qonaqta toı ıeleri oıyn oınatyp, syılyqqa bir kójek syılaıdy. Sol jalǵyz qoıan kásipkerlikke bet burýyma shabyttandyrdy. Aýyl sharýashylyǵyn qarjylaı qoldaý qory arqyly 1,8 mln teńge nesıege, alǵashqy 40 qoıandy satyp aldym. Qora-jaıdy rettep, qazir qoıandar sanyn 300-ge jetkizdim», - deıdi kásipker.
Baqtyǵalıdiń bıznesin otbasylyq dep aıtýǵa bolady. Kásipkerdiń 7 balasy bar. Mektepten kele sala ákelerine kómektesip, qoıandardyń jem-sýyn beredi, qorasyn tazalaıdy.
Onyń aıtýynsha, balalary bir jaǵynan kásipke mashyqtansa, ekinshiden eńbekqor bolyp ósedi. Ásirese 11-shi synypta oqıtyn uly Bekarystyń bul kásipke qyzyǵýshylyǵy óte zor. Ol qoıan óte ósimtal jáne asyraǵanǵa tıimdi janýar ekendigin qazirden baıqap, bilip otyr.
Baqtyǵalıdiń qorasynda qoıannyń birneshe tuqymy bar. Biri terisimen qundy bolsa, endi biri etti baǵytta. Máselen toǵyz aılyq «velıkan» tuqymdy kójektiń salmaǵy 5 kg deıin jetedi. Odan qazirdiń ózinde 3 kg et alýǵa bolady. Sondaı-aq qoıandardyń taǵy bir ereksheligi qysta sýyqqa tózimdi ári kójekteri kóp bolady.
Kásipker qoıan sanyn keminde eki esege arttyryp, aıyna 100 qoıandy turaqty túrde ótkizip turýdy josparlap otyr.
