Almaty oblysynyń turǵyny shekarada 3,5 keli synappen ustaldy
NUR-SULTAN. QazAqparat - Qazaqstan óńirlerinde «Dopıng» jedel-aldyn alý sharasynyń 2-kezeńi ótip jatyr, dep habarlaıdy QazAqparat tilshisi.
Reıd esirtki quraldarynyń, psıhotroptyq zattar men prekýrsorlardyń zańdy aınalymy salasyndaǵy quqyqbuzýshylyqtardy anyqtaýǵa baǵyttalǵan.
QR Іshki ister mınıstrliginiń habarlaýynsha, aktsııanyń alǵashqy úsh kúninde-aq esirtki quralynyń 75 ampýlasy, psıhotropty zattyń 10 tabletkasy jáne 240,2 tonna prekýrsor men 2805,6 tonna ýly zat tárkilengen.
«Shara barysynda 9 - qylmystyq, 28 ákimshilik quqyqbuzýshylyqtyń beti ashylyp, dárilik quraldardy retseptsiz bosatýdyń 17 faktisi tirkeldi. Buǵan jol bergen 28 adam ákimshilik jaýapkershilikke tartyldy. Onyń altaýy - dáriger», - delingen mınıstrliktiń málimetinde.
Reıdtiń bul jolǵy kezeńinde 26 esirtki qylmysy áshkerelenip, 17 esirtki ótkizý faktisi anyqtalǵan. Onyń ishinde 4 qylmys asa iri kólemde esirtki saqtaý boıynsha tergeýge alynǵan.
«Mysaly, sharanyń alǵashqy kúninde Shymkent qalasyndyń 19 jastaǵy turǵyny geroın satý kezinde ustaldy. Úıin tintý barysynda elektrondy tarazy men jalpy salmaǵy 94,6 gramm geroın salynǵan tórt polıetılen býma alyndy. Al Almaty oblysynyń Qarasaı aýdanynda 1968 jylǵy Jambyl oblysynyń turǵyny ustaldy. Odan salmaǵy 55,7 keli keptirilmegen marıhýana tárkilendi. Esirtkini ol jol sómkelerine tyǵyp ustaǵan. Sondaı-aq, «Qordaı» beketinde Almaty oblysynyń 1950 jylǵy turǵyny shekaradan 3,4 keli synap ótkizbekshi bolǵan. Ýly zattyń qaıdan shyqqany anyqtalyp jatyr», - delingen resmı aqparatta.
