Almaty oblysynyń turǵyny múgedekterge arnalǵan arbasyn órtep jiberdi
TALDYQORǴAN. QazAqparat - Almaty oblysyndaǵy Úshtóbe qalasynyń turǵyny Bolat Abıldınov ortalyqqa kelip, jergilikti bılikke narazylyq retinde óziniń múgedekterge arnalǵan arbasyn órtep jiberdi. 1979 jylǵy azamattyń bul áreketiniń vıdeosy áleýmettik jelilerde jarııalanýda, dep habarlaıdy QazAqparat tilshisi.
Vıdeoda eki qoly men eki aıaǵynan aırylǵan 1-shi top múgedegi baspana ala almaı jatqanyn aıtyp, bıliktiń nazaryn aýdartý úshin osy qadamǵa barǵanyn aıtady. Sondaı-aq oblys ákimi Amandyq Batalovqa eki ret baryp, kire almaı ketkenin tilge tıek etken.
Bolat Abıldınovtyń bul áreketine Almaty oblysy ákiminiń baspasóz hatshysy Ǵalymurat Júkel Facebooke jelisindegi paraqshasynda túsinikteme berdi.
Abıldınov Bolat Qýatuly 1979 jyly týǵan. Úshtóbe qalasynda turyp jatyr. Úılengen. Bir qyzy bar. 1-shi top múgedegi retinde Qaratal aýdanynyń jumyspen qamtý jáne áleýmettik baǵdarlamalar bóliminde 2016 jyldyń 15 qańtarynda tirkelgen. Múgedekterdi ońaltý baǵdarlamasyna sáıkes jeke kómekshiniń qyzmetin alyp otyr. 2016-shy jáne 2017 jyldary eki qol arba berilgen. Al 2017 jyly eki qoly men eki aıaǵyna qajet protezder alǵan. Sondaı-aq er azamatqa aı saıyn 54 306 teńge járdemaqy tólenýde. Áıeli Úshtóbe qalasynda jumys isteıdi. 2016 jyldyń aqpanynda halyqtyń áleýmettik osal toby retinde N310 kezekke turǵan. 2018 jyldyń 25 mamyryna bul kezekte 450 adam tur.
Qaratal aýdanynyń ákimshiligi azamattyń úı jaǵdaıyn tekserip, onyń 20 myń teńgege eki bólmeli páter jaldap otyrǵanyn anyqtaǵan.
Baspasóz hatshysynyń málimdeýinshe, aýdan ákimi Bolat Abıldınovke páter usynǵan. Biraq ol jeke turǵyn úı talap etip otyr.
