Almaty oblysynyń turǵyny «Meıirban ana» halyqaralyq ordenimen marapattaldy
Jambyl aýdany ákiminiń baspasóz qyzmetinen málim etkendeı, kópbalaly ana mundaı marapatqa analyq keń júregi úshin laıyq dep tanylǵan.
«Dede Gorgýd» Ulttyq qory men «Azerbaıjan dúnııasy» jýrnaly taǵaıyndaǵan «Mehriban Ana» («Meıirman ana») halyqaralyq ordenin tabystaý rásimi Jambyl aýdandyq ákimdiginiń ǵımaratynda ótti.
Shara barysynda atalǵan qor prezıdenti, «Azerbaıjan dúnııasy» halyqaralyq jýrnalynyń bas redaktory Eldar Ismaılov pen qoǵam qaıratkeri, álem halyqtary jazýshylar odaǵynyń múshesi, «Túrki álemi» qorynyń múshesi Nasıha Kenjına Álııa Ábsemetovany «Mehriban ana» qurmet ordenimen marapattady. Sondaı-aq Jambyl aýdanynyń ákimi Baǵdat Álıevke qurmet dıplomy tabystaldy.
Aýdan ákimi eki el arasyndaǵy týystyq, dostyq qarym-qatynastyń mańyzdylyǵyn atap ótti.
«Ázerbaıjan men Qazaqstan halyqtarynyń arasyndaǵy qarym-qatynastyń tamyry tereńnen bastaý alady. Ázerbaıjan biz úshin baýyrlas el, dostyǵymyz jarasqan memleket. Sondaı-aq, Kavkaz óńirindegi basty seriktesterimizdiń biri. Eki el arasynda ejelden dostyq qarym-qatynas qalyptasyp, qazirde ol dostyǵymyz bekı túsken. Aramyzda esh ýaqytta saıası kıkiljiń týyndaǵan emes. Al Túrik álemindegi mundaı asa mártebeli marapatqa bizdiń aýdannyń turǵyny ıe bolǵany biz úshin nur ústine nur bolyp otyr. Bul biz úshin asa qýanyshty jaıt ekenin atap aıtqym keledi», - dedi ol.
Atap ótilgendeı, Álııa Ábsemetova jubaıy ekeýi balalar úıinen jeti balany óz qaramaǵyna alyp, qamqorlyq kórsetip otyr. Ol búginde toǵyz balanyń anasy atanǵan.
«Munymen qosa, óziniń jańashyldyǵynyń, belsendiliginiń, eńbekqorlyǵynyń arqasynda qoǵamdyq jumystardan da qalys qalmaıdy. Túrli áleýmettik-qoǵamdyq is-sharalardyń belsendi qatysýshysy. Qazaqstan jýrnalıster odaǵynyń múshesi, volonter, Qazaqstan halqy Assambleıasynyń XXVII seziniń delegaty, oblystyq Assambleıa janyndaǵy Analar keńesiniń múshesi», - dedi aýdan ákimi.
Óz kezeginde Eldar Ismaılov ózderin qushaq jaıa qarsy alǵan aýdan ákimine alǵys aıtyp, eki el arasyndaǵy qarym-qatynastyń tarıhyna toqtaldy.
«Geıdar Álıevtiń basshylyǵymen Ázerbaıjan qarqyndy túrde damı tústi. Al Qazaqstan bolsa, Elbasy Nursultan Nazarbaevtyń arqasynda damýdyń jańa deńgeıine kóterildi. Kezinde TMD elderi Geıdar Álıevti óte dana ári kóregen basshy, aqsaqal retinde qurmettep, onyń pikirine qulaq asatyn. Qazir mundaı qurmetke Nursultan Nazarbaev ıe bolyp otyr. Túrik álemi bolsyn, búkil álem elderi bolsyn Nazarbaevty ómirlik, saıası tájirıbesi mol, óz halqy men eliniń jaǵdaıyn jaqsartyp, beıbit ómir syılaǵan tulǵa retinde syılaıdy. Bul óńirdi basshylyqtyń tabysty jumysy men aýdan turǵyndarynyń birliginiń arqasynda kórkeıip otyrǵan aýdan retinde jaqsy bilemiz. Biz túbimiz bir, túrkilerdiń urpaǵymyz. Al qazir bizdi dostyq pen yntymaqtastyq baılanystyryp otyr. Ázerbaıjan halqynyń basyna bult úıirilip, qasiret shekkende, qýǵyn-súrgin kezinde qazaq halqy bizge demeý bolyp, úlken qoldaý bildirdi», - dedi E.Ismaılov.
