Almaty oblysynyń turǵyny meken jaı anyqtamasynan óziniń túrmede otyrǵanyn bilgen
TALDYQORǴAN. QazAqparat - Almaty oblysy Eskeldi aýdanynyń prokýratýrasyna Qarabulaq kentiniń 27 jastaǵy turǵyny shaǵymdanyp, óziniń jeke kýáligin bireýler qoldan jasaǵanyn jáne eshbir qylmysqa barmasa da, QR Quqyqtyq statıstıka bazasynda ony qylmystyq jaýapkershilikte tartý týraly málimetterdiń baryn aıtqan.
Aýdan prokýrory Qadyrjan Isataı málim etkendeı, aryz avtory bul týraly Halyqqa qyzmet kórsetý ortalyǵyna meken jaı anyqtamasyn alýǵa barǵan kezde bilgen. Anyqtamada onyń Taldyqorǵan qalasyndaǵy abaqtyda tirkelgendigi jazylǵan.
Tekserý barysynda Quqyqtyq statıstıka komıtetiniń bazasynda kórsetilgen qylmystarǵa er adamnyń rasymen de esh qatysy joqtyǵy anyqtaldy. Jınalǵan materıaldar tekserý úshin Almaty oblysynyń ózindik qaýipsizdik basqarmasyna jóneltildi. Endigide ózge adamnyń atyna taǵy bir jeke kýálik kimniń salǵyrttyǵynan jasalǵandyǵy anyqtalatyn bolady.
«Anyqtalǵandaı, aryz berýshiniń aýyldasy jasaǵan qylmysynan keıin ustalǵan kezde, polıtseılerge óziniń kórshisiniń jeke bas málimetterin bergen. Onymen qosa, ol ózge adamnyń qujatymen birneshe ret qylmystyq jaýapkershilikke tartylǵan bolyp shyqty», - dep naqtylady Qadyrjan Isataı.
