Almaty oblysynyń turǵyny qonaqqa kelgen turǵynnyń kóligin urlap, apatqa ushyrady
TALDYQORǴAN. QazAqparat - Almaty oblysynyń turǵyny qonaqqa kelgen turǵynnyń kóligin urlap, apatqa túsip, oqıǵa ornynan qashyp ketti, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, tártip saqshylar quqyq buzýshyny ustady.
1- shilde kúni Sarqan aýdany polıtsııa bóliminiń kezekshi bólimine tanysynyń úıine qonaqqa barǵan 49 jastaǵy er azamat, sol jerde «Aýdı» markaly avtokóliginiń urlanǵany týraly aryzdanǵan. Atalǵan derek QR QK 200-babynyń 1-bóligi boıynsha tirkeldi.
Oqıǵa ornyna jetken jedel-tergeý toby jedel-izdestirý sharalaryn júrgizip, nátıjesinde kúdikti 34 jastaǵy aýyl turǵynyn anyqtap, ustady. Ol qylmys jasaǵanyn tolyq moıyndap, 29 maýsym kúni oǵan «Aýdı» markaly avtokóligimen tanysy qonaqqa kelgenin jetkizgen. Olar birge spırttik ishimdik ishken. Ekinshi kúni, saǵat 00.00 shamasynda kólik ıesi uıqyǵa ketken kezde, kúdikti onyń kiltin alyp, avtokólikti aıdap áketip, balyq aýlaýǵa barǵan.
Jol boıynda ol «Kamazben» betpe-bet kelip, kólikti basqara almaı, aǵashqa soǵylǵan. Kólikti syndyrǵan ol qoryqqannan jol-kólik oqıǵasy oryn alǵan jerden qashyp ketken. Ol óziniń tanystarynyń úıinde jasyryn, alaıda ishimdik ishken ony polıtsııa qyzmetkerleri taýyp aldy. Polıtsııa qyzmetkerleri kórsetilgen orynnan synǵan avtokólikti taýyp, ony tekserýden keıin zańdy ıesine qaıtardy. Kúdikti mekenjaıyn ózgertpeý týraly qolhatpen bosatyldy. Endi ol kólikti urlaǵany, mas kúıinde basqarǵany jáne JKO úshin zań aldynda jaýap beredi.
