Almaty oblysynyń turǵyny bir jyl buryn adam óltirgenin moıyndady
TALDYQORǴAN. QazAqparat - Almaty oblysynyń Qaratal aýdanyndaǵy Úshtóbe qalasynyń turǵyny bir jyl buryn adam óltirgenin moıyndady. 27 jastaǵy jigittiń aıtýynsha, ol óziniń týǵan aǵasyn pyshaqtap óltirip, jertólege kómip tastaǵan, dep habarlaıdy QazAqparat tilshisi.
Anyqtalǵandaı, 12 qańtar kúni «102» nómirine Úshtóbe qalasynyń turǵyny habarlasyp, óziniń aýyr qylmys jasaǵany jóninde aıtqan. Sózinshe, 2017 jyldyń 16 sáýirinde týǵan aǵasymen janjaldasyp, pyshaqtap óltirgen. Qylmysyn jasyrý úshin máıitti úıiniń jertólesine kómip tastapty. Kúdikti aıtqan jer tekserilip, ol jerden jartylaı shirigen er adamnyń máıiti tabyldy.
«Belgili bolǵandaı, janjal eki azamattyń dastarhan basynda ishimdik iship otyrǵanda týyndaǵan. Qazir atalǵan fakti boıynsha qajetti sot-medıtsınalyq saraptamalar taǵaıyndaldy. Kúdikti ustaldy. Qazir onyń ústinen QR QK 99 babyna «Adam óltirý» sáıkes is qozǵalyp, tergeý jalǵasýda», dep málim etti oblystyq ІІD baspasóz qyzmeti.
Al kúdikti óz kinásin ólgen aǵasynyń jıi túsine kirip, mazasyn qashyrǵandyqtan qylmysymdy moıyndadym dep túsindirgen.
