Almaty oblysynyń turǵyny áıelin óltirdi degen kúdikpen ustaldy
TALDYQORǴAN.QazAqparat - Almaty oblysynyń turǵynyna áıelin óltirdi degen kúdik keltirilip, qamaýǵa alyndy. Atalmysh azamattyń kámelettik jasqa tolmaǵan 4 balasy bar. Qazir jaýapty mekemeler balalardyń bolashaq taǵdyryn sheshý máselesin qarastyryp jatyr, dep habarlaıdy QazAqparat tilshisi.
Qandy oqıǵa Almaty oblysynyń Talǵar aýdanynda bolǵan. 21-shi qarasha kúni kópqabatty úılerdiń birinde erli-zaıypty jandar janjaldasyp qalǵan. Urystyń sońy adam ólimimen aıaqtalǵan. Atalmysh oqıǵa týraly jedel járdem qyzmetine 13 jastaǵy qyz qońyraý shalyp, anasyna kómek kórsetýdi suraǵan soń belgili bolǵan. Dárigerler oqıǵa ornyna kelgende 36 jastaǵy áıeldiń máıitin tapty. Qylmys bolǵan úıge jedel túrde jetken polıtseıler kúdikti retinde áıeldiń kúıeýin ustady. Er azamat aşy sýǵa sylqııa toıyp alypty. Al qandy oqıǵaǵa «qyzǵanysh» sezimi sebep bolýy múmkin. Qylmystyq áreketke as úıdegi pyshaq paıdalanylýy yqtımal. Kúdikti ishimdik iship, mas bolǵanynan qaramastan, pyshaqty kıimderdiń arasyna jasyryp úlgergen.
«Qazir tabylǵan pyshaq aıǵaq zat retinde tirkeldi. Kúdiktiniń ústinen QR QK 99-shy baby ıaǵnı, «adam óltirý» faktisi boıynsha is qozǵalyp, tergeý jalǵasýda», dedi oblystyq ІІD baspasóz qyzmetindegiler.
Kúdikti azamat qandy oqıǵaǵa baılanysty jaýabyn berip, qamaýǵa alyndy. Al anasynan aıyrylyp, ákesi qamaýda otyrǵan 4 balanyń taǵdyryn mamandar sheshedi.
