Almaty oblysynyń turǵyny áskerı qyzmetshini soqqyǵa jyqty
TALDYQORǴAN. QazAqparat - Almaty oblysynda kólik júrgizýshisi karantındik aýmaqta tártipti qadaǵalap júrgen áskerı qyzmetshige judyryq jumsaǵan, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, eki áskerı sarbaz ózderine bekitilgen Qarasaı aýdanynyń Raıymbek aýylynda tártipti qadaǵalap júrgen.
«Patrýl talaby boıynsha toqtaǵan Lada Granta kóliginiń 51 jastaǵy ıesi avtokólikten shyǵyp, ózgeleriniń alysta turǵanyn paıdalanyp, 24 jastaǵy áskerı sarbazdy soqqyǵa jyqqan. Jergilikti turǵyn oqıǵa ornynan iz sýytqan. Qazirgi ýaqytta kúdikti azamat ustaldy jáne ýaqytsha ustaý ızolıatoryna qamaldy»,- dedi Qarasaı APB tergeý bóliminiń tergeýshisi Aıdyn Seıitov.
Atalǵan derekke qatysty QR Qylmystyq kodeksiniń 380-baby 1-bóligine sáıkes sotqa deıingi tergeý amaldary júrgizilip jatyr. Kúdiktiniń buǵan deıin qylmystyq jaýapkershilikke tartylǵany, ıaǵnı 2004 jyly densaýlyqqa qasaqana jeńil jaraqat salǵany úshin sottalǵany anyqtaldy.
