Almaty oblysynyń turǵyny ákimge 50 mln teńgege jasalǵan aryqtan sý aqpaıtynyna shaǵymdandy
TALDYQORǴAN.QazAqparat - Almaty oblysy ákiminiń esebinde Eskeldi aýdanynyń turǵyny Elena Ýlevataıa halyqtyń atynan shaǵymyn jetkizdi.
Turǵynnyń sózinshe, ákimdiktiń 50 mln teńgege jasaǵan aryǵynan sý aqpaı tur. Sonyń saldarynan aýyl turǵyndary baqsha ege almaı otyr, - dep habarlaıdy QazAqparat tilshisi.
«Biz aýylda turamyz. Bizge baqsha egý kerek. Qarabulaq aýylyndaǵy (red: Eskeldi aýdanynyń ortalyǵy) «Melkombınat» shaǵyn aýdanynda aryq júıesi bolmaǵandyqtan, túrli mekemege shaǵymdanyp, áıteýir aryq jasaıtyn bolyp sheshildi. Jasaýyn jasady, biraq odan sý aqpaıdy. Jergilikti bılikke aıtsaq, endi ne isteımiz degendeı, sharasyz kúıde otyr. Sizden osy máseleni sheship berýińizdi suraımyz», - dedi Elena Ýlevataıa Amandyq Batalovqa halyq aldyndaǵy esebinde.
Almaty oblysynyń ákimi birden Eskeldi aýdanynyń ákimi Raýan Raqymbekovten ne sebepti aryqtarda sý joq ekenin surady. Al aýdan ákimi aryqtar boıynsha arnaıy komıssııa qurylyp, problemany anyqtaýǵa tyrysyp jatqandaryn jetkizdi.
«Zańsyz qurylystar aryqtyń boıymen júrgizilgen. Kóktemde jumystardy júrgizemiz», - dedi Eskeldi aýdanynyń ákimi Raýan Raqymbekov.
Al oblys ákimi Amandyq Batalovtyń «Bul jumystarǵa qarajat bar ma?» degen saýalyn aýdan ákimi jaýapsyz qaldyrdy.
«Qarabulaqta qatelespesem 24 myńdaı halyq bar. Sultan Myrzabekuly ákim bolǵanda qala ataýyn berýdi suraǵan. Aryq máselesin sheshýdi tapsyramyn. Ol jerde kóp bolsa zańsyz qurylys bir-eki úı ǵana shyǵar. Men saǵan tapsyrma beremin, máseleni shesh», - dedi Amandyq Batalov Eskeldi aýdanynyń ákimine.
