Almaty oblysynyń turǵyny 25 jol belgisin urlap ketken
Almaty oblystyq Polıtsııa departamenti baspasóz qyzmetiniń málimetinshe, 17 mamyr kúni túngi saǵat 02:00 shamasynda patrýldik polıtsııa qyzmetkerleri kúdik týdyrǵan kólikti baıqaǵan. Talǵar aýdanynyń Panfılov aýylynda atalǵan kólikti tekserý kezinde temirden daıyndalǵan 25 jol belgisi tabylǵan. Kólikti 32 jastaǵy azamat tizgindegen. Aıtýynsha, ol jol belgilerin Tuzdybastaý aýylyna jaqyn jerden Úlken Almaty kanaly boıynan urlap alǵan. Maqsaty – temir qabyldaý ornyna ótkizý.
«Ár jol belgisiniń quny – 4800 teńge. Jalpy shyǵyn kólemi – 120 000 teńge. Jol belgilerin urlaý arqyly memleketke materıaldyq shyǵyn keltirip qana qoımaı, jol qozǵalysy qaýipsizdigine tikeleı qaýip tóndiresizder. Jol belgileriniń bolmaýy saldarynan túrli jol apaty bolyp, adam da kóz jumýy múmkin»,- dedi Talǵar aýdandyq polıtsııa basqarmasynyń bastyǵy Janbolat Zıadın.