Almaty oblysynyń turǵyndary jol jáne múlik qaýipsizdigine alańdaýly
ALMATY. QazAqparat – Almaty oblysynda Qarasaı aýdanynyń turǵyndary jol jáne múlik qaýipsizdigine alańdaýly, dep habarlaıdy QazAqparat tilshisi.
«Almaty oblysynda «Joldaǵy qabyldaý» atty aqparattyq-túsindirý aktsııasy aıaqtaldy. Aktsııa barysynda turǵyndarmen tyǵyz keri baılanys ornatý maqsaty qoıyldy. Osy arqyly azamattar ishki ister organdarynyń jumysyna qatysty ózderin tolǵandyrǵan suraqtaryna jaýap aldy», - deıdi Almaty oblysy polıtsııa departamentiniń Qarasaı aýdandyq polıtsııa basqarmasynyń bastyǵy, polıtsııa polkovnıgi Ashat Danııar.
Onyń aıtýynsha, eki kúnde 100-den astam adam ýájin aıtyp kelgen.
«Azamattar negizinen joldaǵy qaýipsizdik, óńirdegi kóshi-qonnyń jaǵdaıyna qatysty suraqtar qoıdy, jedel bólimshelerdiń ókilderinen múlik, sonyń ishinde malynyń amandyǵyn saqtaý boıynsha keńester aldy. Budan bólek, ishki ister organdarynyń quzyretine kirmeıtin máseleler boıynsha da suraqtar qoıyldy. Onyń arasynda turǵyn úı, turmystyq-kommýnaldyq qatynastardy retteýge qatysty suraqtar da boldy. Sottyń ǵana aralasýymen sheshiletin azamattyq daýlary barlar da keldi. Biz ári zańger bolǵandyqtan, birde-bir ótinishti jaýapsyz qaldyrmadyq. Quzyretimizge kirmeıtin máselelerdi basqa jergilikti atqarýshy organdarǵa jiberdik», - dedi Ashat Danııar.
Onyń sózine qaraǵanda, kelip túsken ótinishterdi taldaýdyń qajettigin eskere otyryp, ákimshilik polıtsııa, jergilikti polıtsııa qyzmeti, kóshi-qon qyzmeti jáne basqa da qyzmetter men bólimshelerdiń basshylarynan arnaıy alqa jasaqtalatyn boldy.
«Joldaǵy qaýipsizdik pen kóshi-qon, avtokólikti tirkeý, júrgizýshi kýáligin, tólqujattar, kýálikter berý, jol qozǵalysyn uıymdastyrý, kólik quraldaryn qaıta jabdyqtaý, ákimshilik quqyq buzýshylyqtarǵa aıyppul tóleý máselelerine qatysty suraqtar kóp boldy», - deıdi basqarma bastyǵy.
Avtor: Elaman Turysbekov
