Almaty oblysynyń turǵyndary memleket qajettiligine alynǵan jer telimi úshin beriletin somaǵa kelispeıdi
Kókózek aýylynyń bastamashyl toby ıelikten shyǵarylatyn jer ýchaskeleriniń baǵalaý qunymen kelispeıtinderin aıtyp, jer ýchaskelerin satyp alý kezinde júz sharshy metrine 800 myńnan 1 mln teńgege deıin tóleý talaptarymen Almaty oblysy ákimdigi ǵımaratynyń janyna jınaldy.
Almaty oblysy ákiminiń orynbasary Nurjan Qudaıbergenov Kókózek aýyly turǵyndarynyń narazylyǵyn tyńdap, olardyń árqaısysymen jeke kezdesý ótkizdi.
Kezdesý barysynda olarǵa «Memlekettik múlik týraly» Zańnyń 69-babynyń 4-tarmaǵyna sáıkes osy baptyń 3-tarmaǵynda kórsetilgen múddeli tulǵalardyń bireýimen múlikti berý týraly kelisimge qol jetkizilmegen kezde jer ýchaskesin nemese ózge de jyljymaıtyn múlikti memleket muqtajy úshin jer ýchaskesin alyp qoıýǵa baılanysty májbúrlep ıelikten shyǵarý júzege asyrylatyny sot tártibimen júzege asatyny túsindirildi.
«Joǵaryda atalǵan Zańnyń 61-babynyń 3-4-tarmaǵyna sáıkes menshik ıesi nemese memlekettik emes jer paıdalanýshy jer ýchaskesin memleket muqtajy úshin alyp qoıýǵa baılanysty jer ýchaskesin nemese ózge de jyljymaıtyn múlikti májbúrlep ıelikten shyǵarý týraly habarlama alǵan sátten bastap memleket ony satyp alýǵa basym quqyqqa ıe bolady. Memleket muqtajy úshin ıelikten shyǵarylatyn múliktiń menshik ıesiniń quqyqtaryn qorǵaý sot tártibimen júzege asyrylady»,- dep atap ótti oblystyq ákimdikten.
Bastamashyl top Almaty oblysy ákiminiń atyna jer ýchaskelerin qaıta baǵalaýdy basqa baǵalaý kompanııasyna júrgizý týraly ótinish berdi.
«Ótinish Qazaqstan Respýblıkasynyń qoldanystaǵy zańnamasynyń talaptaryna sáıkes qaralatyn bolady. Baǵalaýshylar buryn júrgizgen jumys qaıta qaralyp, alyp qoıýǵa arnalǵan ýchaskeler naryqtyq baǵaǵa sáıkes qaıta qaralyp, baǵalanady»,- dep habarlady ákimdikten.
Ákimdiktiń habarlaýynsha, osy jyldyń shilde aıynda táýelsiz baǵalaýshy kompanııa Almaty-Baıserke-Talǵar gaz qubyrynyń qurylys jelisinde ornalasqan Kókózek aýylyndaǵy 481 jer ýchaskesine baǵalaý júrgizdi. Onyń jalpy quny 3 469 620 264 teńge dep baǵalandy.
- Nysanaly maqsaty (baý-baqsha jáne saıajaı júrgizý) júz sharshy metrge baǵalaý somasy 393 507 teńge;
- Nysanaly maqsaty (jeke qosalqy sharýashylyq júrgizý) júz sharshy metrge baǵalaý somasy 539 766 teńge.
Buǵan deıin Almaty oblysynda Almaty – Baıserke –Talǵar gaz qubyrynyń ekinshi jelisiniń qurylysy bastalatyny týraly jazǵan edik. Sondaı-aq JEO-2 jáne JEO-3-ti gazben qamtamasyz etý úshin Qarasaı aýdanynda 612 jer telimin satyp alý qajet ekeni aıtylǵan.
2014 jyly «Almaty-Baıserke-Talǵar» gaz qubyrynyń birinshi jelisiniń qurylysy aıaqtaldy. 2016 jyly Almaty oblysy ákiminiń qaýlysymen eń az araqashyq aımaǵy 150 metr jáne 25 metr qorǵaý aımaǵy belgilendi.