Almaty oblysynyń turǵyndary qarý tapsyryp, 8 mln teńge aldy
TALDYQORǴAN. QazAqparat - Almaty oblysynda qarýdy tirkeý jáne ony saqtaý erejesin buzǵan 385 adam anyqtaldy. Onyń 211-i qarýdy saqtaý tártibin buzsa, 174-i qoldanystaǵy zańnamaǵa sáıkes qaıta tirkeý talabyn oryndamaǵan, dep habarlaıdy QazAqparat tilshisi.
«Ýchaske» respýblıkalyq jedel aldyn alý sharasy barysynda, sondaı-aq zańsyz aınalymnan 15 qarý tárkilengen.
Almaty oblystyq Polıtsııa departamenti taratqan aqparatqa sáıkes, óńirde jyl basynan beri 574 túrli qarý tárkilengen. Onyń ishinde 36 oıyq uńǵyly myltyq, 405 tegis uńǵyly ańshy myltyǵy jáne elektrlik, gaz jáne travmatıkalyq qarý túrleri bar. Sondaı-aq, ishki ister organdarynda tirkelmegen 136 qarý tabylyp, tárkilendi. Bıyl azamattyq jáne qyzmettik qarý-jaraq aınalymynyń tártibin buzǵan 1700-ge jýyq azamat ákimshiliq jaýapkershilikke tartyldy.
«Qarýlardy saqtaý, satý jáne satyp alýǵa qatysty zań talaptarynyń oryndalýyn baqylaý maqsatynda bıyl «Qarý» jedel aldyn alý is-sharasy 4 márte ótkizildi. Osy sharalar barysynda 700-den astam ártúrli quqyq buzýshylyqtar anyqtaldy. Qaýipsizdikti qamtamasyz etý maqsatynda atalǵan kemshilikter túzetilip, aıypty tulǵalar tıisti jaýapkershilikke tartyldy. Qarý-jaraqty zańsyz saqtaǵan eki tulǵaǵa qatysty qylmystyq is qozǵaldy»,- dep tolyqtyrdy vedomstvonyń baspasóz qyzmetinen.
Sonymen qatar, azamattardan qarý túrleri men jarylǵysh zattardy satyp alý baǵdarlamasy boıynsha bıyl polıtsııaǵa 96 adam ótinish bildirip, 147 dana qarýdy tapsyrǵan. Atalǵan azamattar tapsyrǵan qarýlary úshin 8 mıllıon teńgeden astam syıaqy alǵan.
foto: inalmaty.kz