Almaty oblysynyń turaqtandyrý qorynda 1,3 myń tonna ónim bar
Almaty oblysynda baǵany turaqtandyrý jumysy eki mehanızm boıynsha iske asyrylýda. Birinshisi, jeke ınvestıtsııalar esebinen shamamen 10 núkteden turatyn saýda pavılondary jelisin salý bolsa, ekinshi baǵyt boıynsha 12 iri taýar óndirýshilerge jyldyq 0,01% jeńildetilgen nesıeler berý. Bul sharalar óz kezeginde aımaqtaǵy áleýmettik mańyzy bar azyq-túlik taýarlar baǵasynyń shekten aspaýyna yqpal etpek.
Qazirgi tańda naryqtaǵy baǵanyń sharyqtap ketpeýiniń aldyn alý úshin jeńildikpen nesıe berýge 4,6 mlrd teńge qarastyrylǵan. Búginde atalǵan qarjynyń 3 mlrd teńgesi ıgerilgen. Igi bastamanyń aıasynda Aqsý qant zaýyty, «Kóger» jáne «Sarybulaq» qus fabrıkasy, «Lázzat-2016» sút zaýyty, «Sardar» nan kombınaty jáne 8 saýda sýbektisine, onyń ishinde Toımart jelisi sııaqty 12 iri taýar óndirýshiler jyldyq 0,01% jeńildetilgen nesıe alyp úlgerdi.
Atalmysh nesıe alýshy kásipkerlik sýbektileriniń qorynda 4 800 tonna ónim bar. Olar - kartop, sábiz, pııaz, un syndy áleýmettik mańyzy bar azyq-túlikter bolyp tabylady. Osy oraıda, táýligine jarty mıllıonǵa jýyq jumyrtqa, 15 myńnan astam nan ónimderimen qamtamasyz etetin naýbaıhanalar men qus fabrıkalaryna qosymsha kómek kórsetilip otyrǵanyn atap ótken lázim.
Aıta keteıik, aldaǵy tańda 8 myń tonnadan astam áleýmettik mańyzdy ónimdi óndirý úshin jalpy quny 1,6 mlrd teńge qosymsha nesıe taǵy bólinetin bolady. Sonyń nátıjesinde áleýmettik mańyzdy azyq-túlik ónimderdiń 16 túri boıynsha qor qalyptastyrylmaq.
Baǵanyń kúrt kóterilýiniń aldyn alý úshin «Magnum», «Small» jáne «Toımart» syndy iri saýda jelilerinde kúndelikti monıtorıng júrgiziledi. Sonymen qatar aýdan ortalyqtarynda da turaqty túrde monıtorıng júrgiziledi. Áleýmettik taýarlar baǵasynyń ósýi tirkelgen jaǵdaıda turaqtandyrý qorynan jáne taýar óndirýshilerden jetkizýdi uıymdastyrý boıynsha jedel sharalar qabyldanady.
«Biz aýdandarmen tyǵyz baılanystamyz. Áleýmettik mańyzdy azyq-túlik qajettiligi boıynsha sońǵy 7 kúnde korporatsııaǵa oblystyń 15 aýdanynan jáne 2 qalasynan 1 500 tonna ónim jetkizýge ótinimder kelip tústi. Onyń ishinde 428 tonna oblystyń 8 aýdanyna jóneltildi. Áleýmettik qalypty nan pisirý úshin «AzııaAgroFýd« AQ un tartý kombınatymen undy naýbaıhanalarǵa jóneltý boıynsha kelisi úshin 130 teńge baǵamen 1 myń tonna kóleminde kelisimge qol jetkizildi»,-deıdi «Jetisý «ÁKK» ÓDI» AQ memlekettik baǵdarlamalardy iske asyrý departamentiniń dırektory Bahtııar Sembekov.
Esterińizge sala keteıik, Almaty oblysynda bıýdjetten 5,7 mlrd teńge, onyń ishinde turaqtandyrý qoryna taýarlar satyp alýǵa 1,1 mlrd teńge bólingenin habarlaǵan bolatynbyz. Aǵymdaǵy kúnge turaqtandyrý qorynda 385 mln teńge somasyna 1 330 tonna kóleminde qor bar. Oblys boıynsha 2-3 aıǵa, al keıbir taýarlar boıynsha 6-8 aıǵa qajetti azyq-túlik qory bar. Turaqty túrde qor únemi tolyqtyrylyp otyrady.
