Almaty oblysynyń taýynda qar kóshkini joldy jaýyp qaldy

ALMATY. QazAqparat- Almaty oblysynda qar kóshkini júrdi. Saldarynan oblystyq mańyzy bar Túrgen-Batan-Asy observatorııasy joly jabyldy, dep habarlaıdy QazAqparat tilshisi.

TJM «Qazseldenqorǵaý» memlekettik mekemesiniń málimetinshe, Almaty oblysynda 13 jeltoqsan kúni tańǵy saǵat 9:33-te Túrgen-Batan-Asy observatorııasy baǵytyndaǵy oblystyq avtojoldyń 22,3 shaqyrymynda ózdiginen qar kóshkini júrip ótti. Oǵan taý betkeılerindegi qar jamylǵysynyń turaqsyz jaǵdaıy sebep bolǵan.

«Qar kóshkininiń jalpy kólemi - 99 tekshe metr, uzyndyǵy - 22 m, eni - 6 m, bıiktigi - 4,5 m. Qar kóshkini oblystyq mańyzy bar Túrgen-Batan-Asy observatorııasy jolyn jaýyp qaldy», – dep atap ótti TJM «Qazseldenqorǵaý» memlekettik mekemesinen.

Oqıǵa ornyna «Qazseldenqorǵaý» memlekettik mekemesiniń qyzmetkerleri men Eńbekshiqazaq aýdanynyń qutqarýshylary shyqty. Kóshkinnen zardap shekkender joq.

Foto: instagram.com/kazselezashita