Almaty oblysynyń taýly aımaqtarynda qar kóshkininiń qaýpi basym
TALDYQORǴAN. QazAqparat - Almaty oblysynyń taýly aımaqtarynda qar kóshkininiń qaýpi basym, dep habarlaıdy QazAqparat tilshisi.
Óńirde bıyl qar qalyń jaýyp, sońǵy kúnderi kún kúrt jylynyp ketti. Apatty jaǵdaı boldyrmaý maqsatynda tótenshe jaǵdaılar qyzmetkerleri «Qazselden qorǵaý» mekemesi mamandarymen Іle jáne Jońǵar Alataý silemderine aerovızýaldy baqylaý júrgizdi.
Zertteý barysynda qar jamylǵysy turaqsyz ekeni anyqtaldy. Taýly aımaqta qar qalyńdyǵy 80 santımetrge jetken. Qutqarýshylardyń aıtýynsha eldi-mekenderge tikeleı keler qaýip joq. Alaıda aýa temperatýrasynyń kóterilýine baılanysty aqpan aıynyń sońyna deıin qar kóshkini júrýi múmkin.
Tikushaqpen baqylaý kezinde taý bókterinde birneshe jerde ózdiginen qar kóshkininiń júrýi tirkeldi. Mamandar turǵyndarǵa taýǵa shyǵyp, shańǵymen syrǵanamaýǵa keńes beredi.
«Zertteý nátıjeleri boıynsha qazirgi ýaqytta taýly jerlerde qar jamylǵysy turaqsyz, eldi mekenderge kóshkinnen tikeleı qaýip joq. Ózen arnalarynda seń keptelisi baıqalmaıdy. «Qazgıdromet» boljamy boıynsha aýa temperatýrasynyń kóterilýine baılanysty aqpan aıynyń sońyna deıin kóshkin qaýpi saqtalady»,- delingen Almaty oblystyq Tótenshe jaǵdaılar departamenti baspasóz qyzmetiniń habarlamasynda.
