Almaty oblysynyń taýly aımaqtarynan taǵy da órt shyqty
Baspasóz málimetterine qaraǵanda, 27 qyrkúıek kúni saǵat 15:19-da Almaty oblysynyń Tótenshe jaǵdaılar departamentine Almaty oblysy Eskeldi aýdanydaǵy Taldyqorǵan ormanshylyǵynyń Qora shatqaly aýmaǵyndaǵy altynshy omarta aımaǵynda, taýly aýmaqta qurǵaq shópter, butalar, aralas ormandar janyp jatqany týraly habarlama kelip tústi.
Órt shyqqan jerge birden Almaty oblysy TJD kúshteri men quraldary jiberildi.
27 qyrkúıek kúni áýeden baplaý júrgizildi. Nátıjesinde órttiń aýdany shamamen 20 ga ekendigi anyqtaldy. 28 qyrkúıek kúni saǵat 09-30-daǵy jaǵdaı boıynsha shatqaldan áli tútin shyǵyp jatqan belgili boldy.
QR TJM «Qazavıaqutqarý» AQ tikushaǵy órt shyqqan aımaqqa sý shashyp jatyr. TJD kúshimen jaqyn mańdaǵy aýdandyq bólimshelerdiń qyzmetkerlerinen, jergilikti atqarýshy organdardyń qyzmetkerlerinen qosymsha toptar quryldy. Shtab uıymdastyryldy, úzdiksiz baılanysty uıymdastyrý úshin komandalyq – shtabtyq kólik, ushqyshsyz ushý apparat-drony bar jedel top aerovızýaldy baqylaý úshin jiberildi.
Órtti sóndirýge Almaty oblysy TJD 51 qyzmetkeri jáne 10 birlik tehnıkasy men 4 motopompa, Taldyqorǵan orman sharýashylyǵynan 35 qyzmetkeri jáne 3 birlik tehnıka men 4 motopompasy, 5 «Qazavıaormanqorǵaý» qyzmetkeri, sondaı-aq QR TJM «Qazavıaqutqarý» AQ tikushaǵynyń 1 borty jáne 4 ekıpaj adamy jumyldyryldy.
«Eldi mekenderge qaýip joq. Eń jaqyn eldi meken-Tekeli qalasy 17 shaqyrym qashyqtyqta ornalasqan»,-delingen Almaty oblysy TJD baspasóz qyzmeti taratqan habarlamada.
