Almaty oblysynyń taýlarynda qatty jańbyrdan keıin taǵy da sel júrdi
TALDYQORǴAN. QazAqparat - Almaty oblysynyń taýlarynda qatty jańbyrdan keıin taǵy da sel júrdi. Laı-batpaq aralas tasqyn Saryózek-Kóktal tas jolynda, Panfılov aýdanyna qarasty Aqjazyq aýylynyń mańynan 9 maýsym kúni keshki 17.00 shamasynda aǵyp ótken, - dep habarlaıdy QazAqparat tilshisi.
Ózen kópiriniń asty selmen aǵyp kelgen aǵashtarmen bitelip, batpaq joldyń ústine jaıylǵan. Tas joldyń jabyndysyna zııan kelgen joq. Qazirgi tańda mamandar jol sapasyn tekserip, hattama toltyrýda. Tabıǵattyń tosyn minezinen zardap shekkender joq, materıaldyq shyǵyn kelmegen.
Aıta ketý kerek Almaty oblysynyń taýly aımaqtarynda kún kúrkirep, jańbyr jaýyp, sel júrý qaýpi arta túsken. Sondyqtan qutqarýshylar turǵyndar men taýda demalýshylarǵa barynsha saq bolýdy eskertedi.
«Eń birinshi halyqqa aıtatynymyz jaýyn-shashyn kezinde, aýa raıy kúrt ózgergen jaǵdaıda, taýly aımaqqa jáne ózen jaǵalaýlaryn barmaýyn suraımyz»,- dedi «QAZSELDENQORǴAÝ» MM Jetisý Alataýy aýmaqtyq paıdalaný basqarmasy fılıaly jetekshisiniń orynbasary Aıdos Sabyrbaev.
