Almaty oblysynyń taýlarynan esirtki jınaǵan turǵyn ustaldy
«Arnaıy is-shara barysynda Kegen aýdanyndaǵy «Toraıǵyr» taýynda esirtki jınap júrgen 49 jastaǵy azamat ustaldy. Onyń ıyq dorbasynan 3 kelige jýyq marıhýana tárkilendi. Іs boıynsha tıisti saraptama taǵaıyndaldy. Atalǵan derekke sáıkes sotqa deıingi tergeý amaldary júrgizilip jatyr»,- dep málimdedi oblystyq PD baspasóz qyzmetinen.
Tekserý barysynda kúdiktiniń Qapshaǵaı qalasynyń turǵyny ekeni jáne buǵan deıin osyǵan uqsas áreketi úshin qylmystyq jaýapqa tartylǵany belgili boldy. Tergeý barysynda kúdikti quramynda esirtki bar ósimdikti ózi paıdalaný úshin jınaǵanyn jetkizdi. Qazirgi ýaqytta ol mekenjaıyn ózgertpeý týraly mindettememen bosatyldy.
Oblystyq polıtsııa taratqan aqparatqa sáıkes tártip saqshylary jyl basynan beri zańsyz aınalymnan 350 keliden astam esirtki zattaryn tárkilegen. Onyń ishinde marıhýana, gashısh jáne geroın bar.