Almaty oblysynyń Talǵar aýdanynda 174 gektar jerge «Jańa Qýat» saıajaı qalashyǵy salynýda
ALMATY. Mamyrdyń 13-i. QazAqparat / Ádilet Musahaev / - Búgin «Tam qurylys» kompanııasy Almaty oblysy Talǵar aýdanynyń damý perspektıvasy jaıynda baspasóz máslıhatyn ótkizdi,
dep habarlaıdy QazAqparat.
Atalmysh kompanııa Talǵar aýdanynda «Jańa Qýat» saıajaı qalashyǵyn turǵyzýda. «Tam qurylys» ınvestıtsııalyq-qurylys kompanııasynyń Bas dırektory mindetin atqarýshy Larısa Plotnıkovanyń aıtýynsha, bul kólemi jaǵynan TMD elderiniń ishinde eń aýqymdy qalashyq bolmaq. «174 gektar jerdi alyp jatqan saıajaı qalashyǵynan Ońtústik astamyzǵa jetý úshin 20 mınýttaı ýaqyt ketedi. Jospar boıynsha salynýǵa tıisti 2000 úıdiń 500-i qazir salynyp bitti. Salynǵan úıler barlyq talaptarǵa saı, ári seısmıkalyq turǵydan qaýipsiz. Sonymen qatar bul qalashyqta jastarǵa arnalǵan shaǵyn úıler de turǵyzylýda. Qazirgi ýaqytta qalashyqty gazben jáne tas jolmen qamtamasyz etý jumystary júrgizilip jatyr», deıdi L.Plotnıkova.
Qazir 400-den astam otbasy «Jańa Qýat» saıajaı qalashyǵynan úıli bolyp, jaıly ómir súrýde. Sonymen qatar munda mektepke deıingi jastaǵy balalarǵa arnalǵan ortalyq salynǵan jáne mektep salý isi josparlanýda.
Talǵar aýdany ákiminiń orynbasary Berdáýlet Abdýlaev aýdanda adamdar kóp shoǵyrlanǵandyǵyn jáne olardy turǵyn úımen qamtamasyz etýdegi Úkimettiń baǵdarlamasyn qoldaıtynyn jetkizdi. «Bul qalashyqta turý kóptegen adamdarǵa, sonyń ishinde jastarǵa óte tıimdi. Al Talǵar aýdany keleshegi úlken aýdandardyń biri. Qazir 2011 jylǵy Qysqy Azııa oıyndaryn ótkizýde bıotlon stadıony, aspaly jol salynýda, sondaı-aq muz aıdyny bar. Onda kúni-túni aýdanymyzdyń jastary shynyǵýda. Sonymen qatar aýdanymyzda Jetigen-Qorǵas temirjoly, Batys Qytaı - Batys Eýropa avtojoly sııaqty úlken jobalar júrip jatyr», dep atap ótti óz sózinde ákimniń orynbasary.
Sonymen qatar ol aýdanda osy ýaqytqa deıin gaz máselesi sheshilmeı kelgendigin jáne byltyrdan beri «Kaztransgaz» arqyly úsh aýylǵa gaz tartylyp jatqandyǵyn aıtty.
