Almaty oblysynyń Shonjy aýyly karantınge jabyldy

TALDYQORǴAN. QazAqparat - Almaty oblysy, Uıǵyr aýdanyndaǵy Shonjy aýylynda karantındik sharalar kúsheıtildi. Uıǵyr aýdandyq bas sanıtarlyq dárigeriniń qaýlysymen eldi mekenge kiretin joldarǵa blokpostar qoıyldy, dep habarlaıdy QazAqparat tilshisi.

Sońǵy bir aptada bul aýylda koronavırýs juqtyrýdyń 21 jaǵdaıy tirkelgen. Shonjyǵa endi tek osy aýylda tirkelgen turǵyndar, jumys isteıtinder men mańyzdy qyzmetterdiń ókilderi ǵana kire alady.

«Koronavırýs ınfektsııasy taralýynyń aldyn alý jáne Uıǵyr aýdany turǵyndarynyń ómiri men densaýlyǵyn qorǵaý maqsatynda aýdan ortalyǵy - Shonjy aýylynyń kireberis jerlerine 4 blokpost qoıyldy. Buǵan aımaqta koronavırýs juqtyrǵandar sanynyń kúrt artýy sebep.

Búginde Shonjy aýylynyń 21 turǵynynan vırýs anyqtaldy. Olarmen qarym-qatynasta bolǵandar úı jaǵdaıynda oqshaýlanyp, indet oshaǵy zalalsyzdandyryldy. Epıdemıologııalyq jaǵdaıdyń kúrdelenýine baılanysty ákimshilik aýmaq baqylaýǵa alyndy. Tártip saqshylary men dárigerler jolaýshylardyń dene qyzýyn tekserip, saýalnama júrgizip, túsindirme jumystaryn júrgizýde», - delingen Almaty oblystyq Sanıtarlyq-epıdemıologııalyq qadaǵalaý basqarmasynyń baspasóz qyzmeti jarııalaǵan habarlamada.

Qazirgi ýaqytta tórt blokpost óz jumysyn bastady.

Bir eskeretin jáıt, aýdan aýmaǵyndaǵy ystyq sý kózderindegi týrıstik nysandar barlyq sanıtarlyq talaptarmen jumysyn jalǵastyra bermek.