Almaty oblysynyń sharýalary oblys ákiminen kómek surap otyr
TALDYQORǴAN.QazAqparat - Almaty oblysynyń Kóksý aýdanyndaǵy Musabek aýylynyń sharýalary oblys ákiminen kómek surap otyr. Soıa ekken dıqanshylar 70 gektar egin sý astynda qaldy dep dabyl qaǵýda. Qazir alqapqa tehnıka kire almaı, batpaqqa batyp jatyr, dep habarlaıdy QazAqparat tilshisi.
Al sharýalardyń aıtýynsha, egindi sý basýyna drenaj júıesi sebep eken. Tipti egistik alqabyndaǵy jer asty sýy aýyl ortasyna deıin jetken. Qazir Musabek aýylyndaǵy úılerdiń jertólesinde kóterilgen sý tizege deıin jetedi.
«Biz tek oblys ákimi Amandyq Batalovtan kómek suraımyz. Bizge basqa eshkim kómektese almaıdy. Bizdiń baratyn jerimiz joq. Suraıtynymyz drenaj júıesin qalpyna keltirip, qazyp, tazalap berse boldy. Osy eginmen bala-shaǵamyzdy asyraýdamyz. Bizge kómek kerek», deıdi Musabek aýylynyń turǵyny, sharýa qojalyǵynyń jetekshisi Ashat Oralov.
Al Musabek aýyldyq okrýgine eki aı buryn ǵana taǵaıyndalǵan ákim jaǵdaıdan habardarmyn deıdi.
«Bıýdjetten qarjy qaralyp jatyr. Osy jyldyń sońyna deıin oń sheshimin tabady. Keler jyly káriz júıeleri qolǵa alynyp, tazalanady», deıdi Musabek aýyldyq okrýginiń ákimi Jandos Jumaǵulov.
Sharýalar ár gektardan keminde 2 tonna ónim alatynbyz deıdi. Qazir naryqta soıanyń ár tonnasy 100 myń teńgeden dep eseptesek, 70 gektar jerdegi ónimniń quny 14 mln teńge eken. Qyrýar qarjy dalaǵa ketti, eńbegimiz esh boldy degen sharýalardyń sońǵy úmiti oblys ákiminde. Másele sheshiledi dep úmitterin úzbeı otyr.
