Almaty oblysynyń sharýalary egistikke qajetti sýǵa úsh ese qymbat tólep kelgen
Almaty oblysy Sybaılas jemqorlyqqa qarsy is-qımyl departamentiniń mamandary zańsyz kommertsııalyq qyzmet faktilerin anyqtady. Irrıgatsııalyq jelilerg monıtorıng barysynda aýylsharýashylyǵy kooperatıvteriniń sýarý kanaldaryna quqyqtary joq ekeni belgili bolǵan. Tabıǵı monopolııalar tizilimine kirmeı, zańsyz kommertsııalyq qyzmetpen aınalysqan.
Olar sýdy Qonaev atyndaǵy Úlken Almaty kanalynan («Qazsýshar» fılıaly) bekitilgen tarıfke sáıkes alǵan, alaıda ony fermerlik sharýashylyqtarǵa joǵary baǵamen satqan. Osylaısha, ózderine monopolıst rólin alǵan.
«Rezervýardaǵy sýdyń quny Úlken Almaty kanalynda 1 m3 úshin 0,7 teńge bolsa, aýyl sharýashylyǵy taýaryn óndirýshilerge gektaryna 20 000-28 000 teńgeden beredi. Bul – ortasha eseppen 1 m3 úshin 2 teńgeden asady. Osy arnalardy senimgerlik basqarý jónindegi sharttarda 24-ten 2-eýi ǵana bola alady. Qalyptasqan jaǵdaı aýyl sharýashylyǵy taýaryn óndirýshiler quqyqtarynyń buzylýyna alyp keldi. Budan bylaı sýarmaly sýdy fermerler tikeleı Úlken Almaty kanalynan alady», - delingen vedomstvo baspasóz qyzmetiniń habarlamasynda.
Máselen, Eńbekshiqazaq aýdanynyń bir ǵana Qaraturyq aýyldyq okrýginde 272-den astam sharýa qojalyǵy bar. Departament usynysy negizinde tikeleı Úlken Almaty kanalynan 1 m3 úshin 0,5 teńgemen sharttar jasasý máselesi pysyqtaldy.
Osylaısha, bir aýyldyq okrýg 42 mln teńgeden astam qarajat únemdeı alady. Sondaı-aq, basqa aýyldyq okrýgterde tikeleı sharttar jasasý máselesi qaralyp jatyr.
Foto: yuz.uz