Almaty oblysynyń Saryózek kenti karantınge jabylady

TALDYQORǴAN. QazAqparat- Koronavırýs ınfektsııasynyń birneshe deregi tirkelýine baılanysty indettiń taralýyna jol bermeý maqsatynda Almaty oblysyndaǵy Kerbulaq aýdanynyń Saryózek kenti karantınge jabylady. Osyǵan saı aýdannyń bas memlekettik sanıtarlyq dárigeri E.Eshkenovtyń qaýlysy qabyldandy, dep habarlaıdy QazAqparat tilshisi Almaty oblysy ákiminiń baspasóz qyzmetine silteme jasap.

Atalǵan qaýlyda karantın kezindegi shekteýler, sanıtarlyq-dezınfektsııalyq sharalar týraly egjeı-tegjeıli atap kórsetilgen. Qaýly talaptaryna sáıkes Saryózek turǵyndarynyń úıden shyǵýyna tyıym salynady. Bir otbasydan tek bir adamǵa ǵana kúnine bir ret azyq-túlikke, dárihanaǵa, birinshi kezektegi qajettilikter alýǵa shyǵýyna ruqsat etiledi. Karantın rejımin buzǵan azamattar Qazaqstan Respýblıkasynyń zańnamalaryna sáıkes ákimshilik jaýapqa tartylady.

Atap ótsek, Saryózektegi karantın 17 sáýirden 18-ine qaraǵan túngi saǵat 00.00-den 1 mamyrǵa deıin sozylady dep belgilengen.

Esterińizge sala keteıik, búgin Almaty oblysynda koronavırýspen aýyrǵandar sany taǵy 8 adamǵa artty.

Onyń ishinde Kerbulaq aýdanynda COVID-19 ınfektsııasyn juqtyrǵan adamdardyń sany — beseý. Olardyń eń úlkeni 35 jasta, eń kishisi 3 jastaǵy bala. Syrqattarmen baılanysta bolǵan 38 adam karantınge alyndy.

Jalpy Almaty oblysynda koronavırýspen aýyrǵandar sany 37-ge jetti.