Almaty oblysynyń prokýratýrasy quqyq qorǵaý qyzmetteri ortalyǵyn ashty
Barlyq keńes berý qyzmeti tegin, dep habarlaıdy QazAqparat tilshisi.
Saltanatty sharaǵa Almaty oblysynyń ákimi A. Batalov, quqyq qorǵaý organdarynyń basshylary, qoǵamdyq uıymdar, prokýratýra organdarynyń ardagerleri qatysty. Oblys prokýrory A.Jylqybaev, bul Ortalyq 100 naqty qadam Ulttyq josparynda quqyqtyq qyzmetterdi bir orynǵa ıntegratsııalaý talaby aıasynda ashylyp jatqanyn atap ótti.
Atalǵan ortalyqta azamattardyń quqyqtyq máseleleri boıynsha suraqtarmen tájirıbeli prokýrorlar aınalysatyn bolady. Azamattardyń ótinishterin qaraýdy tıimdi uıymdastyrý úshin advokattar, medıatorlar, notarıýstar qyzmet kórsetedi.
«Oblys prokýratýrasyna jyl saıyn 11 000-nan asa aryz túsedi. Birazy bizdiń quziretke jatpaǵandyqtan, biz olardy basqa organdarǵa joldaımyz. Endi bul másele sheshildi. Barlyq organdar jınalyp, halyqtyń suraqtaryn sheshetin bolamyz. Eger sotta sheshiletin suraq bolsa advokattar talap aryz jazýǵa kómek beredi, daý-damaıdy sotsyz sheshýge medıatorlar qolushyn sozady»,-dep atap ótti oblys prokýrory A.Jylqybaev.
Ortalyqtyń negizgi mindeti - shaǵymdardy jedel sheshý, azamattardyń quqyq qorǵaý jáne memlekettik organdarǵa degen senimin arttyrý, ákimshilik kedergiler men bıýrokratııany joıý bolyp tabylady.
