Almaty oblysynyń polıtsııasy jol boıynda kókpar tartqandardy izdestirip jatyr
ALMATY. QazAqparat - Almaty oblysy ІІD Qarasaı aýdanyndaǵy jol apatyna baılanysty tekserý jumystaryn júrgizip jatyr, dep habarlaıdy QazAqparat tilshisi. Kókparshylardyń biri jeńil kóliktiń áınegin syndyryp, bamperin qıratqan bolatyn.
Oblystyq ІІD taratqan aqparatqa sáıkes, atalǵan derek Qarasaı aýdandyq ishki ister basqarmasynda tirkelgen. «Oıynǵa qatysqandar men uıymdastyrýshylar izdestirilip jatyr. Olar tabylǵan soń óz áreketterine qaraı jaýapkershilikke tartylatyn bolady», - dedi baspasóz qyzmetinen.
Aıta ketý kerek, Almatylyq Anastasııa Kýlakova áleýmettik jelidegi paraqshasynda jol ústinde kókpar tartqandardyń biriniń kóligin zaqymdaǵanyn jazǵan bolatyn.
Jylqynyń tuıaǵy kóliktiń kapoty men aldyńǵy áınegin, bamperin syndyryp jibergen.
«29 shilde kúni 19:45 shamasynda Qarǵaly eldi mekeniniń ishimen kele jatqanmyn. Jol ústinde kókpar tartqan birneshe atty kezdesti. Kólikti toqtatýǵa májbúr boldym. Sol kezde kókparshylardyń biriniń atynyń aıaǵy kóligime tıip, kapot, bamper, aldyńǵy áınek syndy», - dedi Anastasııa Kýlakova.
