Almaty oblysynyń polıtsııasy ustalǵan bıznesmenge qatysty aıtty
TALDYQORǴAN. QazAqparat - Almaty oblysynyń polıtsııasy iri kólemde alaıaqtyq jasady degen kúdikpen ustalǵan aýyl bıznesmeni Asylbek Áýkenovtiń isine qatysty resmı jaýap berdi, dep habarlaıdy QazAqparat tilshisi.
Buǵan deıin áleýmettik jelide Asylbek Áýkenov ózin arnaıy operatsııa barysynda ustaǵanyn jáne oǵan jala jabylǵany jóninde vıdeo jarııalaǵan bolatyn. Ol vıdeojazbada ózi mingen kólikke qarý-jaraqty qasaqana salyp jibergenin aıtady. Sondaı-aq Panfılov aýdanynyń polıtseıleri ózinen para talap etkenin atap ótedi.
Almaty oblystyq PD basshysynyń orynbasary Bolat Tenezbaevtyń sózinshe, A.Áýkenovti ustaý operatsııasyna Panfılov aýdanynyń polıtseıleri jumyldyrylmaǵan.
«Áleýmettik jelilerde jáne BAQ-ta kúdikti Áýkenovtiń ustalǵan sáti qyzý talqylanýda. Júrgizilgen barlyq sharalardyń mán-jaıyn tolyq bilmegendikten, halyq jarııalanǵan beınejazba boıynsha birjaqty analız jasaǵan. Ustaý operatsııasy qatań túrde zań aıasynda júrgizilgenine sendiremin. Kúdikti Sybaılas jemqorlyqqa qarsy ulttyq bıýroǵa Panfılov aýdanynyń polıtseıleri para talap etkeni týraly aryzdanǵannan keıin, onyń kóligine qarý-jaraq qasaqana tastaldy degen paıymdarǵa negiz joq. Sebebi kúdiktini Almaty oblystyq Polıtsııa departamentiniń ókilderi ustady. Jáne bul iske Panfılov aýdanynyń polıtseıleri jumyldyrylǵan joq», - dedi departament basshysynyń orynbasary.
B.Tenezbaev barlyq taraptardyń aryz-shaǵymy jan-jaqty tekseriletinin jetkizdi.
«Kúdiktiniń para talap etti degen aryzy boıynsha Ulttyq bıýro tekserý júrgizip jatyr»,- dep tolyqtyrdy ol.
Polıtsııa departamenti baspasóz qyzmetiniń málimetinshe, iri kólemdegi alaıaqtyq boıynsha ustalǵan 37 jastaǵy A.Áýkenovtiń áreketterine Qylmystyq kodekstiń birden 4 baby boıynsha baǵa berilgen: 195-baptyń 4-bóligi, 287-baptyń 3-bóligi, 190-baptyń 4-bóligi jáne 389-bap.
Qazirgi tańda tergeý amaldary júrgizilýde.
Kúdikti QR Qylmystyq is júrgizý kodeksiniń 128-babyna sáıkes ýaqytsha ustaý oqshaýlaǵyshyna qamaldy. Jaqyn arada sotqa deıingi tergeý barysyna bultartpaý sharasyn qoldaný máselesi sheshiletin bolady.
Esterińizge sala keteıik, aǵymdaǵy jyldyń 14 sáýirinde 42 jastaǵy azamatsha B.Ábilmajın kúdikti A.Áýkenov ózinen aldaý jolymen asa iri kólemdegi arnaıy tehnıkasyn ıemdenip alǵanyna aryzdandy (QR QK 195-baby, 4-bóligi: «Aldaý nemese senimdi teris paıdalaný jolymen múliktik iri zalal keltirý»).
Sotqa deıingi tergeý barysynda anyqtalǵandaı, A.Áýkenov B.Ábilmajınniń jubaıyn QHR-dan Qazaqstanǵa qaıtarýǵa járdem kórsetemin dep alaıaqtyq jolmen onyń 11 mıllıon teńge aqshasyn alǵan. (QR QK 190-b. 4-b: «Asa iri mólsherdegi alaıaqtyq»). Sonymen qatar, ustalǵan azamat ozbyrlyq jolymen jábirlenýshiniń jubaıynyń «Toyota Land Cruser Prado» markaly avtokóligin ıemdengen (QR QK 389-baby «Ózinshe bılik etý»).
Kúdikti A.Áýkenov jedel-tergeý sharalary barysynda ustaldy.
«Sotpen sanktsııalanǵan tintý kezinde kýágerlerdiń qatysýymen avtokólik salonynan zańsyz saqtalǵan qarý tárkilendi (QR QK-niń 287-babynyń 3-bóligi «Atys qarýyn zańsyz saqtaý»)», - delingen Polıtsııa departamentiniń aqparatynda.
