Almaty oblysynyń polıtsııasy ıisshil ıttiń kómegimen iri kólemde esirtki tárkiledi
TALDYQORǴAN. QazAqparat - Almaty oblysynda ıisshil ıt toqtatylǵan kóliktiń ishinen iri kólemde esirtki tapty, dep habarlaıdy QazAqparat tilshisi.
Almaty oblysy ІІD baspasóz qyzmetiniń habarlaýynsha, esirtki jasyrǵan «Toıota Prevııa» kóligi «Almaty-Bishkek» tasjolynda ustalǵan. Toqtaǵan avtokólikke polıtsııa «Taımas» atty ıisshil ıtti jiberip, ol kóliktiń júksalǵyshynan 13 keli 280 gramm keptirilgen marıhýanany tapqan. Al júksalǵyshtaǵy esirtki zaty salynǵan sómkeniń ıesi kólikte jolaýshy retinde otyrǵan Jambyl oblysynyń 60 jastaǵy turǵyny bolyp shyqty.
«Avtokólik «Aqterek» jol-patrýldik polıtsııasy beketinde tekserý úshin toqtatyldy. Onda oblystyq Kınologııa qyzmeti ortalyǵynyń ıisshil ıtteri jumyldyrylady. Jalpy alǵanda sońǵy úsh jarym aıda osyndaı qyzmettik ıtterdiń kómegimen 80 kelige jýyq esirtki zattaryn tárkiledik, sonyń ishinde 5 kelige jýyq gashısh bar. Itterdiń arasynda osy - labrador tuqymdy «Taımas» eń joǵary nátıje kórsetken bolatyn» - dep atap ótti polıtsııa bóliminen.
Esirtki tasymaly boıynsha ustalǵan azamat qamaýǵa alynǵan. Fakti boıynsha sotqa deıingi tergeý bastaldy.
