Almaty oblysynyń Polıtsııa departamenti avtokólikterdiń jappaı tekserilýin túsindirdi
TALDYQORǴAN. QazAqparat - Almaty oblysynda mal urlyǵynyń aldyn alý maqsatynda arnaıy reıdter ótkizilýde. Tártip saqshylary bes kún ishinde úı janýarlaryn urlaýdyń 16 deregin anyqtap úlgergen, dep habarlaıdy QazAqparat tilshisi.
«Barlyq avtojoldarda patrýldik polıtsııanyń blok-posttary qoıyldy. Mal jáne et ónimderiniń zańsyz tasymalyn anyqtaý maqsatynda barlyq avtokólikter tekserilýde. Osy ýaqyt ishinde 405 kólik tekserilip, qujattary zań talabyna sáıkes kelmeıtin 43 júrgizýshige ákimshilik hattama toltyryldy»,- dep málim etti oblystyq Polıtsııa departamentiniń baspasóz qyzmetinen.
Sonymen qatar, tártip saqshylary mal satatyn barlyq bazarlardy, et satý oryndaryn, sharýa qojalyqtary men qystaqtardy tekserýdi jalǵastyrýda.
«Arnaıy is-shara kezinde bes kún ishinde mal urlyǵynyń 16 deregi ashyldy. Kúdiktilerdiń ózge de qylmystarǵa qatysy bary anyqtalýda. Jyl basynan beri maldaryn urlap ketken turǵyndarǵa 35 mıllıon materıaldyq shyǵyn óteldi»,- dep atap ótti oblystyq polıtsııa ókilderi.
Vedomstvo taratqan aqparatqa sáıkes, buǵan deıin jasalǵan birqatar mal urlyǵy ashylǵan. Onyń ishinde 2016 jyly Kegen aýdanynda oryn alǵan urlyqtyń mán-jaıy áshkere bolyp, zardap shegýshilerge materıaldyq shyǵyn óteldi.
Aıta keteıik, oblystyq polıtseıler jyl basynan beri 110 mal urlyǵyn áshkerelep, urylar úptep ketken 200-ge jýyq maldy zańdy ıelerine qaıtarǵan.
