Almaty oblysynyń polıtseıleri júrgizýshilerdi tártipke shaqyrý sharalaryn kúsheıtti
TALDYQORǴAN.QazAqparat - Almaty oblysynyń aýmaǵynda respýblıkalyq «Qaýipsiz jol» jedel aldyn alý is-sharasy bastaldy. Onyń barysynda polıtseıler jol-kólik oqıǵalarynyń aldyn alýdy, olardy boldyrmaýdy basty nazarda ustaıdy, dep habarlaıdy QazAqparat tilshisi.
Statıstıkalyq málimetterge júginsek, jyl basynan beri 900 astam jol-kólik apaty oryn alyp, 170 adam kóz jumǵan, al 1300 astam adam ártúrli dene jaraqatyn alǵan. Jol saqshylarynyń aıtýynsha, kólik apattarynyń basty sebepteriniń biri - júrgizýshilerdiń jyldamdyq tártibin saqtamaýy men qozǵalystyń qarsy baǵytyna shyǵyp ketý bolyp otyr.
«Bıylǵy bes aı ishinde jyldamdyq rejimin buzǵan júrgizýshilerge 9646 hattama toltyrylsa, qarsy baǵytqa shyqqan «temir tulpar» tizgindegen 105 azamat jaýapkershilikke tartylǵan»,- dep málimdedi Almaty oblystyq PD baspasóz qyzmetinen.
Sondaı-aq, óńirde jaıaý júrginshilermen bolatyn kólik apattarynyń aldyn alý boıynsha tıisti sharalar kúsheıtildi. Polıtseıler jyl basynan beri jol júrý erejesin qunttamaıtyn jáne ony óreskel buzǵan 6046 jaıaý júrginshige hattama toltyryp, aıyppul salǵan.
«Arnaıy is-shara barysynda qoǵamdyq kólik júrgizýshileri, ásirese taksı júrgizýshileri tarapynan buzylatyn erejelerdi anyqtaý jáne olardy boldyrmaýǵa baǵyttalǵan sharalar uıymdastyryldy. Іs-sharaǵa ózge de kólik uıymdarynyń ókilderi jumyldyryldy. Ásirese, alkogoldik nemese esirtkilik mas kúıde kólik tizgindegen júrgizýshilerdi anyqtaýǵa erekshe kóńil bólinedi»,- dep atap ótti polıtsııa ókilderi.
Resmı aqparatqa sáıkes, Almaty oblysynda 877 kólik júrgizýshisi ishimdik iship nemese esirtki qabyldap, kólik basqarǵany úshin júrgizýshi kýáliginen aıyrylǵan. Al «Qaýipsiz jol» is-sharasy 22 maýsymǵa deıin jalǵasady.
