Almaty oblysynyń polıtseıleri kópbalaly otbasyna kómek kórsetti

TALDYQORǴAN. QazAqparat - Almaty oblysy Balqash aýdanynyń tártip saqshylary aýdan ortalyǵy Baqanas aýylynda turatyn 6 balaly otbasyna sanıtarlyq qorǵanys quraldarymen qatar, azyq-túlik pen sol úıdegi úsh oqýshyǵa barlyq keńse taýarlaryn aparyp berdi, dep habarlaıdy QazAqparat tilshisi.

«Jeke qurammen kelise otyryp, kópbalaly Ormanbaevtar otbasyna qoldaý kórsetý týraly sheshim qabyldandy. Karantın kezinde otbasyna medıtsınalyq betperde men qolǵaptar, azyq-túlik, sondaı-aq úıdegi úsh oqýshyǵa jańa oqý jylyna arnap barlyq keńse quraldaryn tabystadyq. Іndettiń jappaı taralýyna baılanysty jarııalanǵan tótenshe jaǵdaı kezinen bastap biz kópbalaly jáne kómekke zárý otbasylarǵa únemi qoldaý kórsetip kelemiz»,- deıdi Balqash aýdany polıtsııa bólimi bastyǵynyń mindetin atqarýshy, polıtsııa podpolkovnıgi Nurgeldi Abırov.

Álemdi sharpyǵan osy pandemııa kezinde qınalǵan janǵa qoldaý bergen tártip saqshylaryna kópbalaly otbasy músheleriniń aıtar alǵysy sheksiz.

«Búgin aýdandyq polıtsııa bóliminiń basshylyǵy úıimizge kelip, azyq-túlik pen mektepke qajetti barlyq qural-jabdyqty tabystady. Osyndaı qıyn kezde qolda barymen bólisý, qoldaý – naǵyz ultjandylyqtyń belgisi dep bilemin. Balalarymdy qýanyshqa bólegen polıtseılerdiń jumysyna tabys, otbasylaryna amandyq pen bereke tileımin»,- deıdi Baqanas aýylynyń turǵyny, kópbalaly ana Áıgerim Ǵalymqyzy.

«Polıtseıler sanıtarlyq normalardyń oryndalýyn talap etip qana qoımaı, turǵyndardy qoldan kelgenshe maskamen qamtamasyz etedi. Jaqynda turǵyndarǵa 1500 maskany tegin tarattyq. Ult saýlyǵyn qamtamasyz etý úshin pandemııa kezinde ár adam áleýmettik jaýapkershilik tanytyp, sanıtarlyq talaptardy qatań saqtaýy tıis»,- deıdi aýdandyq ákimshilik polıtsııa bóliminiń bastyǵy polıtsııa podpolkovnıgi Balbek Lepesbaev.