Almaty oblysynyń polıtseıleri Kerbulaq aýdanynan mal urylaryn ustady
TALDYQORǴAN. QazAqparat - Almaty oblysynyń polıtseıleri Kerbulaq aýdanynan mal urylaryn ustady, - dep habarlaıdy QazAqparat tilshisi.
Almaty oblysy Polıtsııa departamenti baspasóz qyzmetiniń málimetinshe, qazan aıynyń birinshi jartysynda Saryózek jáne Shılisý aýyldary turǵyndarynan jeke sektor aýlalarynan túngi ýaqytta qoı men eshkileriniń urlanǵany jaıynda úsh aryz kelip túsken.
Atalǵan derekter QR QK 181-1-baby boıynsha tirkelgennen keıin, tergeýshiler birqatar jedel-izdestirý is-sharalaryn uıymdastyrǵan. Nátıjesinde, olar belsendi kómekshilerdiń kómegimen buryn urlyq jasalǵan oryndarynda baıqalǵan «Mersedes» kóligin baqylaýǵa alǵan.
Kúdik týdyrǵan kóliktiń ıesin tapqan polıtseıler kólik ıesi ony týysqanyna biraz ýaqytqa bergenin anyqtady. Júrgizýshi, aýdan ortalyǵynyń 59 jastaǵy turǵynyn ustaǵan tártip saqshylary kólikten tasymaldanǵan qoılar men eshkilerdiń izderin tapty. Kóp uzamaı ekinshi kúdikti - Qapshaǵaı qalasynyń 29 jastaǵy turǵyny ustaldy. Ustalǵandardyń ekeýi de usynylǵan dáleldemelerden keıin , aýyldyń úsh turǵynynyń 25 bas usaq malyn urlaǵandaryn moıyndady. Tergeý barysynda urlanǵan zatty satyp alýshy Qarasaı aýdany Shalqar aýylynyń 34 jastaǵy turǵyny anyqtaldy, oǵan qatysty QR QK 196-babynyń 2-bóligi boıynsha qylmystyq is tirkeldi. Ol barymtashylardan satyp alynǵan 25 bas usaq maldyń 22-sin qaıta satyp úlgergen. Tek úsh bas mal ǵana alynyp, zańdy ıesine qaıtaryldy.
«Avtokólik qylmys quraly retinde sot sheshimine deıin arnaıy turaqqa qoıyldy. Kúdiktiler QR QІJK 128-babyna sáıkes ýaqytsha ustaý oqshaýlaǵyshyna qamaqqa alyndy. Tergeý soty kúzetpen ustaý túrindegi bultartpaý sharasyn sanktsııalady. Tártip saqshylary ustalǵandardyń oblys aýmaǵynda osyndaı ashylmaǵan qylmystarǵa qatystylyǵyn tekserý boıynsha belsendi jumystar júrgizýde»,- dedi Kerbulaq APB bastyǵynyń orynbasary polıtsııa podpolkovnıgi Álisher Qaptaǵaev.
