Almaty oblysynyń polıtseıleri bir táýlikte esirtki qoldanýdyń 10 deregin áshkereledi

TALDYQORǴAN. QazAqparat - Almaty oblysyndaǵy esirtkiniń zańsyz aınalymyna tosqaýyl qoıýshy polıtseıler aldyn alý jumystary barysynda 10 nashaqordyń zańsyz áreketin áshkereledi, - dep habarlaıdy QazAqparat tilshisi.

Almaty oblystyq polıtsııa departamenti baspasóz qyzmetiniń málimetinshe, atalǵan derekter boıynsha elimizdiń qoldanystaǵy zańnamasyna sáıkes qylmystyq is qozǵaldy.

«Jyl basynan beri biz esirtkige qatysty 641 qylmysty áshkereledik. Aýyr qylmystar sanatyna jatatyn esirtki satýdyń 73 deregi tirkelse, onyń 23 jaǵdaıynda asa iri kólem ekeni anyqtaldy»,- deıdi Almaty oblysy PD Esirtkige qarsy is-qımyl basqarmasynyń bastyǵy, polıtsııa polkovnıgi Qazbek Muhamedov.

Basqarma bastyǵynyń aqparatyna sensek, polıtseıler jyl basynan beri tórt jarym tonnadan astam ártúrli esirtki ónimderin tárkilep, kózin joıǵan.

«Onyń ishinde 307 gramm geroın, 530 kılogramǵa jýyq marıhýana, 45 kılogramǵa jýyq gashısh, sondaı-aq 400 grammnan astam ártúrli sıntetıkalyq esirtki túrleri bar. Oblys aýmaǵyndaǵy esirtkiniń zańsyz aınalymynyń jolyn kesýge baǵyttalǵan sharalardy josparly túrde jalǵastyramyz»,- dep tolyqtyrdy polkovnık Qazbek Muhamedov.