Almaty oblysynyń polıtseıleri aýrýhanada jatqan balalarǵa bardy
TALDYQORǴAN. QazAqparat - Almaty oblysynyń polıtseıleri kólik apatynan zardap shekken balalardyń qal-jaǵdaıyn bilip, tezirek saýyǵýyn tilep qaıtty. Qazir Taldyqorǵandaǵy oblystyq balalar aýrýhanasynda kólik apatynan zardap shekken 4 jetkinshek jatyr, dep habarlaıdy QazAqparat tilshisi.
Patrýldik polıtsııa qyzmetkerleri aýrýhanada jatqan balalarǵa syılyqtaryn berip, árqaısysyna qarańǵyda janatyn arnaıy brasletterdi syıǵa tartty. Sondaı-aq jol júrý erejelerin túsindirip, naýqastardyń tezirek saýyǵýlaryn tiledi.
«Qazir hırýrgııa bóliminde jatqan 4 bala kólik apatynan zardap shekken. Oqıǵanyń bireýi jaqynda Sarqan aýdanynda boldy. Júrgizýshi óziniń joldasymen jáne eki balasymen qonaqqa bara jatqan. Sol sátte kólik aýdarylyp, eki eresek adam qaıtys boldy. Bir bala zardap shekti. Endi oǵan operatsııa jasalady. Kóp jaǵdaıda balalar jolda muqııat bolmaýynyń saldarynan kóliktiń astyna túsip jatady. Biz úlkender kólikpen kele jatqanda úlken jaýapkershilikti sezinýimiz kerek. Balalar úlkenderdiń kesirinen zardap shekpeýi tıis», - dedi Almaty oblystyq polıtsııa departamenti jergilikti polıtsııa qyzmetiniń aǵa ınspektory Aıjan Álıbaıkyzy.
Jyl basynan beri Almaty oblysynda kámelettik jasqa tolmaǵan balalardyń qatysýymen 221 kólik apaty tirkelgen. Sonyń saldarynan 269-y jaraqat alyp, 10 bala mert bolǵan.
