Almaty oblysynyń polıtseıleri asyl tuqymdy jylqylardy urlaǵan adamdy ustady
TALDYQORǴAN. Qańtardyń 27-si. QazAqparat /Sandýǵash Dúısenova/ - Almaty oblysynyń Jambyl aýdandyq ishki ister bólimine shaǵymmen kelgen Uzynaǵash aýylynyń turǵyny, qorasynan bes asyl tuqymdy jylqynyń urlanǵanyn habarlady.
Oblystyq ishki ister departamentiniń baspasóz qyzmetinen habarlaǵandaı, jylqylar Uzynaǵash aýylynan 2 shaqyrym jerde ornalasqan baý-baqsha brıgadasyndaǵy saraıdan urlanǵan. Mal ıesi kelgen jalpy shyǵyndy 4 mıllıon teńgege baǵalady.
Polıtsııa qyzmetkerleri jedel-izdeý sharalarynyń barysynda osy aýyldyń turǵynyn ustady, urlanǵan jylqynyń úsheýi onyń qorasynan tabyldy. Eki aqalteke jylqysy, kúdiktiniń aıtýynsha, túngi aıdaý kezinde joǵalyp qalǵan.
Polıtseılerdiń aıtýynsha, álginiń taǵy eki sybaılasy bolǵan, olardy izdeý sharalary jalǵasýda. Mal urlaý fakti boıynsha qylmystyq is qozǵalyp otyr.
